Գլխավոր / Հայաստան / «Ամբողջ գյուղը ոտի ա». Արագածի բնակիչները պահանջում են ստուգել գյուղապետին

«Ամբողջ գյուղը ոտի ա». Արագածի բնակիչները պահանջում են ստուգել գյուղապետին

Այսօր Ազգային Ժողովի շենքի առջև տասնյակ գյուղացիներ բողոքի ակցիա էին կազմակերպել: Գյուղացիները Արագածոտնի մարզի Ապարանի տարածաշրջանի Արագած գյուղից էին, ովքեր ԱԺ Վերահսկիչ պալատից պահանջում էին ստուգումներ իրականացնել իրենց գյուղապետարանում:

Epress.am-ի հետ զրույցում ակցիայի մասնակից Վահանը ներկայացրել է խնդիրը:

«Մեր գյուղը տարածքի ամենամեծ գյուղն ա, 4600 բնակիչ ունի, բայց էսօր բոլորն ուզում են գնան գյուղից: Ահավոր լարված վիճակ ա: Ոչ մեկ չի հասկանում` գյուղում ինչ ա կատարվում, ոնց ա աշխատում գյուղապետը: Ինքը գյուղացիներին բաժանել ա յուրայինների ու ոչ յուրայինների»,- պատմել է գյուղի բնակիչը:

Նա նշել է, որ իրենք իրենց դիմումները ստորագրություններով հանձնել են ՀՀ նախագահի նստավայր, ՀՀ ԱԺ նախագահին, ՀՀ Կառավարությանը, սակայն դեռևս ոչ մի պատասխան չեն ստացել:

«Էնքան խնդիրներ կան գյուղում, չեք պատկերացնի: Հողերի օտարում ա տեղի ունենում, գյուղացիները ոչ մի բան չեն իմանում դրա մասին, ուսանողների ուսման վարձի փոխանցում ա կատարում գյուղապետը, բայց փոխանցում ա ապահովված ընտանիքների էրեխեքի համար, ոչ թե անապահով, իսկ գյուղում էնքան մարդ կա, որ տոկոսի, վարկերի տակ են, չեն կարում վճարեն իրանց էրեխեքի վարձերը: Հետո Կառավարության կողմից գարու էլիտար սերմնացու ա հատկացվել գյուղին, որ գյուղապետն էլ տա անապահով ընտրանիքներին, բայց մինչև հիմա տեղյակ չենք, թե որտեղ ա ցանվել էդ գարին, ուր ա գնացել էդ սերմնացուն»,- վրդովված պատմել է գյուղացին:

Նա նշել է, որ իրենց գյուղապետ Գագիկ Պողոսյանը 12 տարի է` զբաղեցնում է գյուղապետի պաշտոնը և վերջերս գրանցվել է Հանրապետական կուսակցությունում:

«Մենք ուզում ենք, որ գան ստուգումներ կատարեն, տեսնեն` ինչ ա կատարվում, որ էդ ժողովուրդը մի քիչ հանդարտվի, թե չէ էս դիմումների պատասխանները եթե բացասական եղան, ամբողջ գյուղը ոտի ա, պատրաստ ա գա Կառավարության դեմ»,- ասել է մեր զրուցակիցը: