Home / Հայաստան / Ֆրեյզեր. Ղարաբաղյան պատերազմը կործանիչ կլինի Ռուսաստանի համար

Ֆրեյզեր. Ղարաբաղյան պատերազմը կործանիչ կլինի Ռուսաստանի համար

«Ի տարբերություն մի շարք այլ վերլուծաբանների, ես մինչ այժմ էլ կարծում եմ, որ Ռուսաստանը դրական դերակատարություն ունի Լեռնային Ղարաբաղի հիմնախնդրի կարգավորման համար ճանապարհների որոնման հարցում: Նախագահ Մեդվեդևը անձամբ շատ ժամանակ է ծախսել` փորձելով խաղաղ համաձայնության հասնել»,- Turan գործակալության հետ զրույցում հայտարարել է Միջազգային ճգնաժամային խմբի Եվրոպական ծրագրերի ղեկավար Սաբինա Ֆրեյզերը:

Նրա խոսքով` Լեռնային Ղարաբաղի պատերազմը կործանիչ կլինի Ռուսաստանի անվտանգության և հարևանների հետ հարաբերությունների համար, և սա այն չէ, ինչ տեղի ունեցավ 2008-ին ռուս-վրացական 5-օրյա պատերազմի ընթացքում:

«Ղարաբաղյան պատերազմը երկարատև կլինի: Ռուսաստանն իր վրա է վերցրել Հայաստանի անվտանգության ապահովման պարտականությունը, և նա չի կարողանա այն ամբողջությամբ արհամարհել: Մյուս կողմից` Թուրքիան նման պարտավորվածություն ունի Ադրբեջանի հանդեպ: Այս ընթացքում, երբ Թուրքիայի և Ռուսաստանի միջև առկա հարաբերությունները ռազմավարական գործընկերության բնույթ են ստանում, տարածաշրջանում ծագած պատերազմը կբաժանի նրանց և ծայրահեղ բացասական ազդեցություն կգործի երկու կողմերի վրա էլ:

Ստեղծված իրավիճակում պատերազմի բռնկման հեռանկարները բավական իրատեսական են թվում: Սպառազինության հարցում այս մրցավազքը, շփման գծում ստեղծված լարվածությունը, ռազմական հռետորությունը և բանակցային գործընթացում առաջընթացի բացակայությունն այս մասին են վկայում: Ադրբեջանի ռազմական ծախսերը ոչ միայն գերազանցել են Հայաստանի բյուջեն, այլ անգամ կրկնապատկվել են վերջին տարվա ընթացքում»,- նշել է նա:

Լուսանկարը` azatutyun.am

Tekali Taxi