Epress.am Լուրեր Հայաստանից
ՀՀ պաշտպանության նախարար Սեյրան Օհանյանը կարծում է, որ բանակում խնդիրներից մեկն այն է, որ զինծառայողները չեն շփվում, կիսվում իրենց հրամանատարերի հետ, ժամանակին չեն զեկուցում այս կամ այն խնդիրը, որը կարող է լուծվել, և արդյունքում դժբախտ դեպքեր են լինում, մասնավորապես, ինքնասպանություններ: Այս մասին Սեյրան Օհանյանն ասել է Պաշտպանության, ազգային անվտանգության և ներքին գործերի հանձնաժողովի և Մարդու իրավունքների պաշտպանության և հանրային հարցերի հանձնաժողովի «Մարդու իրավունքները զինված ուժերում» թեմայով համատեղ խորհրդարանական լսումների ընթացքում՝ խոսելով Տավուշի մարզում տեղի ունեցած մահվան ելքով միջադեպի մասին:
«Եթե այդ զինծառայողները ժամանակին հրամանատարին զեկուցեին, որ միջանձնային հարաբերություններում նման դեպք կա, միջանձնային հարաբերությունների մեջ խնդիրներ կան, ապա կարելի էր կանխել, և մենք չէինք գտնի զենքի պահասենյակում զինվորին սպանված վիճակում: Միջանձնային հարաբերությունների խախատման արդյունքում ծագած վեճի և այնուհետև հաշվեհահարդար տեսնելու միտումներ կան առայժմ: Իրավապահ մարմինները աշխատում են, ընթացքում ամեն ինչ կբացահայտվի և մենք հասարկությանը կտեղեկացնենք»,- ասել է նա: