Home / Հայաստան / Զինծառայողին հիվանդանոց են հասցրել արդեն մահացած վիճակում

Զինծառայողին հիվանդանոց են հասցրել արդեն մահացած վիճակում

Պարտադիր ժամկետային զինծառայող Էդիկ Շահնազարյանը հիվանդանոցում չի մահացել, ինչպես ավելի վաղ հայտնել էին, այլ նրան արդեն մահացած են բերել հիվանդանոց, կամ էլ հիվանդանոց մուտք գործելու պահին է մահացել, քանի որ անգամ վերակենդանացման բաժանմունք հասցնել չեն կարողացել: Այս մասին Galatv.am-ին հայտնել են Էջմիածնի հիվանդանոցից։

«Հիվանդանոցում չի մահացել զինվորը, բերել են արդեն մահացած: Ինչից է մահացել, նման տվյալները ոնց որ թե հայտնի չեն, հարազատներն էլ ոնց որ թե ստեղ չեն եղել, չենք տեսել ոչ մեկին, դիահերձումից հետո նոր պարզ կլինի, թե ինչից է մահացել: Զորամասից են բերել, զինծառայող է, նշված չէ՝ որ զորամասից, միայն անուն-ազգանունն է նշված»,- ասել են հիվանդանոցի ընդունարանից:

Հարցին, թե զինծառայողի վրա կա՞ն բռնության հետքեր, նա արդյո՞ք ծեծված է եղել, թե ոչ, ո՛չ ընդունարանից, ո՛չ էլ վերակենդանացման բաժանմունքից չեն պատասխանել:

Հիվանդանոցի վերակենդանացման բաժնից էլ կրկնեցին, որ հիվանդանոցը մահացած զինվոր է ընդունել: Վերակենդանացման բաժանմունքի ցերեկային հերթապահի բժշկուհին ասաց, որ ինքը զինծառայողին չի տեսել, նրան գիշերային հերթապահն է ընդունել, ով արդեն տուն է գնացել: Բժշկուհին ասաց, որ երբ ինքը եկել է հիվանդանոց, արդեն զինծառայողը դիահերձարանում է եղել:

Yerkir.am-ի տեղեկություններով` Էդիկ Շահնազարյանը Նոյեմբերյանի շրջանի Կոթի գյուղից է, 4 երեխաներից կրտսերը: Նրա 18 տարին լրացել էր նոյեմբերի 28-ին, իսկ բանակ էր զորակոչվել ընդամենը մեկ շաբաթ առաջ: Կայքի տեղեկություններով` նորակոչիկը քթի վիրահատություն էր տարել և դեռ լիովին չէր ապաքինվել: Բանակում մի քանի օր շարունակ բարձր ջերմություն է ունեցել: Մահվան պատճառը հնարավոր է մրսածությունը լինի և միգրենը:
 
Մահացած զինվորը սոցցանցի իր էջում նկար էր տեղադրել, որին գրված է. «Մարդիկ հաճախ վախենում են մեռնելուց … Նման հիմարները չեն հասկացել, որ ապրելն ավելի դժվար է…»:

Ավելի վաղ ՊՆ քննչական ծառայությունից հայտնել էին, որ փաստի կապակցությամբ ՀՀ ՊՆ քննչական ծառայությունում քննություն է ընթանում։