Գլխավոր / Հայաստան / Հրամանատարը «զղջացել է» ստորադասներին հարվածելու համար․ նրան համաներել են

Հրամանատարը «զղջացել է» ստորադասներին հարվածելու համար․ նրան համաներել են

ՀՀ ՊՆ զորամասի հրամանատար, ներկայումս մեկ այլ զորամասի օպերատիվ բաժնի պետ, գնդապետ Բագրատ Մաթևոսյանը դատավճռով մեղավոր է ճանաչվել իշխանազանցության համար, հայտնում է «Փաստինֆո»-ն։

Երևանի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանը Մաթևոսյանի նկատմամբ վերջնական պատիժ է նշանակել ազատազրկում 3 տարի ժամկետով, բայց նաև ազատել պատժի կրումից՝ «Հայաստանի Հանրապետության անկախության հռչակման 22–րդ տարեդարձի կապակցությամբ համաներում հայտարարելու մասին» որոշման կիրառմամբ:

2013թ. հունվարի 24-ին շարքից ուշանալու կապակցությամբ զինվորների միջև վիճաբանությունից հետո Մաթևոսյանը ջոկի հրամանատար, գործով տուժողին հարցրել էր, թե նա ինչով է զբաղված եղել, որ նրա հրամանատարության ներքո գտնվող զինվորը վիճաբանել է մեկ այլ զինծառայողի հետ, և, լսելով, որ նա անտեղյակ է կատարվածից, Մաթևոսյանը հարվածել է տուժողին, որի հետևանքով նրա քիթը արյունահոսել է:

Բացի այդ, 2013 թվականի մայիսի 25–ին մեկ այլ ջոկի հրամանատարը ինքնակամ թողել է զորամասը, գարեջուր խմել և ոգելից խմիչքի ազդեցության տակ երեկոյան անվանականչից հետո վերադարձել զորամաս: Կատարվածի մասին զեկուցվել է զորամասի հրամանատար Մաթևոսյանին, ով հանձնարարել է իր մոտ ներկայացնել զինվորին: Մաթևոսյանի հարցին, որ արդյոք գտնվում է ոգելից խմիչքի ազդեցության տակ, նա արհամարհական պատասխանել է «ճիշտ այդպես», որից հետո Մաթևոսյանը նրան ևս հարվածել է, «պատճառելով առողջության միջին ծանրության վնաս առողջության տևական քայքայումով, որով էական վնաս է պատճառվել զինվորական ծառայության կրման սահմանված կարգին»:

Առաջադրված մեղադրանքում Մաթևոսյանն իրեն լիովին մեղավոր է ճանաչել և մինչ դատաքննություն սկսելը միջնորդել դատարանին` դատական քննություն անցկացնել արագացված կարգով: Դատարանը բավարարել է միջնորդությունը:

Պատիժ նշանակելիս դատարանը հաշվի է առել, որ 44-ամյա Մաթևոսյանը թեև նախկինում դատապարտված է եղել, սակայն դատվածությունը մարված է և համարվում է դատվածություն չունեցող անձ, «անկեղծորեն զղջացել է կատարած արարքի համար, հրամանատարության կողմից բնութագրվում է դրականորեն, 1991–1994թթ. մասնակցել ՀՀ սահմանների ինքնապաշտպանական մարտերին, բազմիցս խրախուսվել է գերատեսչական պարգևներով, խնամքին ունի մինչև 14 տարեկան երկու երեխա»: