Epress.am Լուրեր Հայաստանից
Աջափնյակ և Դավթաշեն վարչական շրջանի ընդհանուր իրավասության դատարանում պատանդ վերցնելու մեջ մեղադրվող Հրաչյա Գևորգյանի գործով հերթական դատական նիստը հետաձգվել է։
Գևորգյանին դատարանի դահլիճ են տեղափոխել արդեն իսկ վատ առողջական վիճակում և նրա համար շտապօգնություն են կանչել: Ինչպես Epress.am-ին հայտնել է դատական նիստին ներկա Հելսինկյան ասոցիացիայի դիտորդ Արման Վեզիրյանը, Հրաչ Գևորգյանը վերջին 10 օրերին ջերմություն է ունեցել։ Նա դիմել է «Նուբարաշեն» քրեակատարողական հիմնարկի ղեկավարությանը՝ իրեն բժշկական օգնություն ցույց տալու համար, սակայն ոչ մի պատասխան չի ստացել: Գևորգյանը պատմել է, որ ինքը նաև աչքերի հետ կապված խնդիր է ունեցել։ Դատապարտյալը նշել է, որ կուրանում է, և իրեն վիրահատություն է հարկավոր։ Բացի դա, նա խնդրել է վիրահատական ճանապարհով որովայնից հանել մեխը, որն ի նշան բողոքի նա ավելի վաղ կուլ էր տվել, սակայն նրա այդ դիմումները նույնպես մնացել են անպատասխան:
Դատական նիստն անժամկետ հետաձգվել է, սակայն հիվանդին բժշկական օգնություն ցույց տալուց հետո թողել են դատարանում՝ ստիպելով, որպեսզի նա սպասի մինչև «Նուբարաշեն» ՔԿՀ-ից բերված մյուս ամբաստանյալների դատերը ևս կավարտեն: Բոլոր ամբաստանյալներին միասին ՔԿՀ կտեղափոխեն երեկոյան՝ 18.00-ից հետո:
Հիշեցնենք, որ, ըստ մեղադրանքի՝ Հրաչյա Գևորգյանը և Գարիկ Հարությունյանը պատանդ են վերցրել Գևորգյանի քաղաքացիական կնոջը՝ Նաիրա Հարությունյանին, և նրա անչափահաս որդուն, իսկ պատանդներին ազատելու պայմանով կնոջ հորից` պահանջել են գումար, որն ստանալուց հետո ազատ են արձակել պատանդներին:
Պաշտպանական կողմը, սակայն, պնդում է, որ կինը գործ է սարքում իր փաստացի ամուսնու դեմ՝ իր պարտքերը մարելուց խուսափելու համար:
Հիշեցնենք, որ Հրաչ Գևորգյանի գործի ձգձգումից դժգոհ նրա մայրը բողոքի ակցիա էր անցկացրել՝ փորձելով ինքնահրկիզվել նախագահական նստավայրի մոտ: