Epress.am Լուրեր Հայաստանից
Մարտի 25-26-ը Երևանում անցկացված միջազգային համաժողովի ընթացքում հայաստանցի բնապահպանները ՀՀ վարչապետից հանդիպման հրավեր են ստացել։ Ինչպես հաղորդում է «Համահայկական բնապահպանական ճակատ» (ՀԲՃ) նախաձեռնությունը, վարչապետն առաջարկել է հանդիպման ընթացքում քննարկել բնապահպանների կողմից բարձրացվող հարցերը։
«Համահայկական բնապահպանական ճակատի ներկայացուցիչները մի շարք հարցազրույցների ժամանակ շեշտել են, որ վարչապետի հետ հանդիպմանը չեն պատրաստվում մասնակցել, և մատնանշել են այդ մոտեցման պատճառները:
Սակայն մարտի 28-ին ՀՀ կառավարության պաշտոնական կայքը հաղորդագրություն է տարածում, որտեղ հստակ նշված է, որ վարչապետն ընդունել է բնապահպանական ոլորտի մասնագետներին, ովքեր լիազորված են եղել ներկայացնելու «Պատասխանատու հանքարդյունաբերության» համաժողովի ժամանակ բնապահպանական ակտիվիստների բարձրացրած խնդիրները:
Պաշտոնապես հայտարարում ենք, որ Համահայկական բնապահպանական ճակատը չի մասնակցել վարչապետի հետ հանդիպմանը և որևէ մեկին չի լիազորել ներկայացնելու իր կարծիքը: Պետական մարմիններին կոչ ենք անում զերծ մնալ երկխոսության իմիտացիա ստեղծելուց: Փոխարենը՝ կատարել ի պաշտոնե իրենց վրա դրված պարտականություններն ու քայլեր ձեռնարկել․
– հանքարդյունաբերական ոլորտում առկա լրջագույն խնդիրների լուծման ուղղությամբ,
– միջոցներ ձեռնարկել շրջակա միջավայրի անվտանգության դեմ ուղղված հանցագործությունները բացահայտելու և մեղավորներին պատասխանատվության ենթարկելու համար,
– ապահովել Հայաստանի բնակչության իր առողջության և բարեկեցության համար նպաստավոր շրջակա միջավայրում ապրելու իրավունքը», – ասված է բնապահպանների տարածած հաղորդագրության մեջ։