Նախագահականի մոտ սպասում էին Շվեյցարիայի նախագահին՝ շնորհակալություն հայտնելու (ՏԵՍԱՆՅՈՒԹ)

Մինչ ԵԱՀԿ գործող նախագահ, Շվեյցարիայի նախագահ Դիդիե Բուրկհալտերը նախագահական նստավայրում հանդիպում էր Սերժ Սարգսյանի հետ, մի խումբ քաղաքացիներ սպասում էին նրան դիմացի մայթին՝ շնորհակալական նամակ հանձնելու համար:

Քաղաքացիները նշում էին, որ Շվեյցարիայի նախագահը միակն էր, ով պատասխանել էր ՀՀ քաղաքացիների նամակին, որում վերջիններս իրենց մտահոգությունն էին հայտնել Հայաստանում քաղբանտարկյալների առկայության կապակցությամբ:

«Նա պատասխանել էր, որ քանի որ Շվեյցարիան հանդիսանում է հետապնդումների զոհ դարձած մարդկանց սատարող երկրներից մեկը, իրենք հետևում են նաև Շանթ Հարությունյանի և մյուսների գործերին: Եվ հնարավոր ամեն ինչ անում են: Դիվանագիտական պատասխան էր, բայց համենայն դեպս, պատասխան էր»,- ասել է ակցիայի մասնակից Ֆելիքս Հայրապետյանը:

Քանի որ քաղաքացիներին թույլ չեն տվել մոտենալ նախագահին, նրանք որոշել են պաստառներով ցույց տալ իրենց մտահոգությունը և նամակ հանձնել նախագահին ուղեկցող պատվիրակության հետ եկած լրագրողներից մեկին, որպեսզի նա փոխանցի Բուրկհալտերին: Նախագահական նստավայրի մոտ կանգնած ոստիկանները, սակայն, խորհուրդ են տվել նամակները հանձնել Սերժ Սարգսյանի ընդունարան։ Ֆելիքս Հայրապետյանը նշել է, որ կասկածում է, թե նամակն այդ ճանապարհով կհասնի հասցեատիրոջը:

Շնորհակալական նամակում, մասնավորապես, ասված էր․ «Մենք ցանկանում ենք տեղյակ պահել ձեզ, որ չնայած մեր նամակներին, Հայաստանի իշխանությունները արհամարհում եմ քաղբանտարկյալների հարցը, ոտնահարում են նրանց հիմնարար ազատությունները, արտահայտման իրավունքը, արժանապատվությունը: Ավելին՝ հետապնդումներ են սկսել նաև Շանթ Հարությունյանի որդու՝ Շահեն Հարությունյանի դեմ: Նրա հանդեպ մեղադրանք է առաջադրվել՝ հոր վրա ճնշում գործադրելու համար: Չնայած հարցը ուղղակիորեն ձեզ չի վերաբերում, և Հայաստանը մի փշուր է միջազգային ասպարեզում, մենք ձեզ ենք գրում, քանի որ քիչ քաղաքական գործիչներից եք, ով համաձակվում է ձայն բարձրացնել»։