ԴԱՀԿ պետը Սերժ Սարգսյանից արտոնյալ է․ նա հայտարարագրեր չի ներկայացնում․ «Ժողովուրդ»

ՀՀ արդարադատության նախարարության դատական ակտերի հարկադիր կատարման ծառայության (ԴԱՀԿ) պետ Միհրան Պողոսյանն առնվազն վերջին երեք տարիներին գույքի և եկամուտների մասին հայտարարագրերը չի ներկայացրել ՀՀ բարձրաստիճան պաշտոնատար անձանց էթիկայի հանձնաժողովին, գրում է «Ժողովուրդ» օրաթերթը:

Համապատասխան հայտարարագրերը Հանձնաժողովի պաշտոնական կայքում տեղադրված չեն, և թերթը հարցում է արել Բարձրաստիճան պաշտոնատար անձանց էթիկայի հանձնաժողով։ «Ժողովուրդ»-ին պատասխանել են, որ եթե իրենց կայքում հայտարարագրերը չկան, նշանակում է համապատասխան պաշտոնյան չի ներկայացրել դրանք, հակառակ դեպքում փաստաթուղթն անպայման հրապարակած կլինեին:

«Այսինքն՝ կարելի է արձանագրել, որ Միհրան Պողոսյանը Հայաստանի պաշտոնյաներից ամենաարտոնվածն է, ավելին, քան անգամ Սերժ Սարգսյանը, որի հայտարարագրերը նշված հանձնաժողովի կայքում տեղադրված են», ֊ նշում է թերթը:

Ավելի վաղ «Ժողովուրդը» գրել էր, որ Միհրան Պողոսյանը պետբյուջեի գումարներով ԴԱՀԿ֊ի համար իրեն պատկանող «Քեթրին գրուպ» ընկերության կողմից ներմուծվող BYD ավտոմեքենաներ է գնել։