«Ամուլսար․ կյանք, թե՞ հանք»․ բողոք հանքարդյունաբերական ծրագրի դեմ
Այսօր մի խումբ բնապահպաններ «Ամուլսար․ կյանք, թե՞ հանք» խորագրով բողոքի ակցիա են անցկացրել ՀՀ Կառավարության շենքի դիմաց՝ դատապարտելով Ջերմուկից 10 կլիոմետր հեռավորության վրա գնտվող Ամուլսարում ոսկու հանքի շահագործման ծրագիրը և պահանջելով դադարեցնել այն։
«Գնացեք ցիանիդի ծոցը», «Ջուր թե՞ ցիանիդ», «No Mining at Amulsar» (Ոչ Ամուլսարի հանքին), «Hands off Armenia» (Ջեռքերդ հեռու Հայաստանից) գրառումներով պաստառներով բնապահպանները կանգնել են Կառավարության շենքի մոտ և տեղեկատվական թերթիկներ բաժանել անցորդներին։
Դրանց մեջ ասված էր, որ Ամուլսարում նախատեսվում է տարեկան վերամշակվել 10 մլն տոննա հանքաքար, իսկ ոսկին հարստացվելու է խիստ թունավոր նատրիումի ցիանիդի միջոցով, որից տարեկան ներկրվելու և օգտագործվելու է 1000 տոննա։
Բնապահպանները նշում են, որ այս հանքավայրի շահագործումը խաթարելու է Հայաստանի էկոլոգիական և ազգային անվտանգությունը, քանի որ այն վտանգում է երկրի քաղցրահամ ջրերի ռազմավարական պաշարներն ու Ջերմուկ առողջարանային քաղաքը։ Ըստ ակցիայի մասնակիցների՝ անկառավարելի ռիսկեր են ստեղծվելու Որոտան-Արփա-Սևան ջրատար թունելի, Սևանա լճի, Կեչուտի և Սպանդարյանի ջրամբարների, Որոտան և Արփա գետերի համար։
Հիշեցնենք, որ Հայաստանում Ամուլսարի ոսկու հանքավայրի բաց շահագործման նախագծով զբաղվում է «Լիդիան Արմենիա» ընկերությունը: Գլխավոր ներդրողներն են՝ Միջազգային ֆինանսական կորպորացիան (IFC) և Վերակառուցման և զարգացման եվրոպական բանկը (EBRD)։
