Գլխավոր / Հայաստան / Բանակում խելագարված զինվորին զորակոչել են Խաչատուրովի խոսքերին հակառակ

Բանակում խելագարված զինվորին զորակոչել են Խաչատուրովի խոսքերին հակառակ

ՀՀ Զինված ուժերի գլխավոր շտաբի պետ Յուրի Խաչատուրովը երկու տարի առաջ Հովհաննես Վարդանյանին զորակոչելու ժամանակ ասել էր, որ, համաձայն Հովհաննեսի ներկայացրած փաստաթղթերի, նա պետք է ազատվի զինվորական ծառայությունից: Այս մասին Epress.am-ի հետ զրույցում պատմել է Հովհաննեսի հայրը` Վարդանը: Հիշեցնենք, որ տղան մոտ մեկ ամիս առաջ խելագարվել է Ասկերանի զորամասերից մեկում և այժմ գտնվում է Երևանի Նորքի հոգեբուժարանում: Հովհաննեսն ասում է, որ իրեն փորձել են ծեծել և բռնաբարել: Դեպքի առիթով քրեական գործ է հարուցվել:

«Հովիկը տան միակ խնամակալն էր, և Խաչատուրովն ասեց` գնա, փոքր քրոջդ ու մորդ պահի, քեզ չենք ուղարկում: Հետո մի վեց ամիս հետո զինկոմիսարիատից զանգում կանչում են` պիտի տանենք, բա սենց առողջ, բոյով տղեն չծառայի հայրենիքին, էլ ո՞վ ծառայի: Ես իրանց ասում եմ` դուք արհամարհում եք Խաչատուրովի հրամանը, իրանք ինձ ասում են` կներես, բայց տանելու ենք»,- պատմել է հայրը:

Վարդան Վարդանյանն ասել է նաև, որ երբ երեկ ինքն ու կինը այցելել են Նորքի հոգեբուժարան որդուն տեսակցելու, խոսակցություններ են լսել, որ հոգեբուժարանի անձնակազմի վրա ճնշումներ են գործադրվել:

«Բուժքույրերն էին խոսում, որ ճնշել են սաղին, թե` բա ինչի եք թողել, որ եկել, նկարել են: Չգիտեմ էդ ճնշողներն ովքեր են եղել, բայց դե հիմա էլ իրանք են փրփուրներից կախվում», – նշել է Վարդանյանը:

Նրա խոսքով` երեկ ՀՀ ռազմական ոստիկանությունում իրեն ասել են` հնարավոր է տղային հիվանդությունը մորից անցած լինի:

«Ես իրանց ասում եմ` լավ, բա 1 տարի 2 ամիս ծառայել ա, բա խի՞ գիժ չէր, նոր գժվե՞ց: Կամ լավ, որ հիվանդ ա, բա կապտուկները, մարմնի վրայի հետքերը ո՞նց հայտնվեցին»,- ասել է Հովհաննեսի հայրը:

Tekali Taxi