Կենսաթոշակային համակարգի դեմ պայքարողներին ուժով հեռացրել են ՊԵԿ-ի մոտից (ՖՈՏՈ, ՎԻԴԵՈ)

«Դ!եմ եմ» նախաձեռնության անդամները՝ կուտակային կենսաթոշակների դեմ բողոքող հարյուրավոր քաղաքացիների հետ միասին այսօր հերթական անգամ իրենց բողոքի ձայնն են բարձրացրել՝ կոչ անելով պատկան մարմիններին ինքնակազմակերպվել ու կատարել Սահմանադրական դատարանի` պարտադիր բաղադրիչի վճարման կասեցման մասին որոշումը։

«Կասեցում», «Միավորում», «Ամոթ, ամոթ», «Ազատ, անկախ Հայաստան» վանկարկումներով, «Չեմ արտագաղթելու», «Դ!եմ եմ» գրությամբ պաստառներով և սուլոցներով երթի մասնակիցները նախ անցել են Կառավարության, Կենտրոնական բանկի, Պետեկամուտների կոմիտեի շենքերի մոտով, այնուհետ շարժվել դեպի քաղաքապետարան։

Երթի ընթացքում ակցիայի մասնակիցները կոչ են արել աշխատող քաղաքացիներին միանալ իրենց և անօրինական ճնշումների տակ ֆոնդեր չընտրել։

«Հունվարի 28-ի դրությամբ ֆոնդեր էին ընտրել քաղաքացիների 0,5 տոկոսը, այդ թիվը խոսում է անվստահության և կառավարության անպատրաստության մասին։ Կառավարությունն այս 10 տարիների ընթացքում չակերտավոր բարեփոխմանը պատրաստվել է 0,5 տոկոսով, այն էլ՝ ստիպողաբար։ Մենք ասում ենք՝ այս օրենքը չի ներդրվելու, պարտադրելու ենք մեր իրավունքները», – ասել է երթի մասնակիցներից մեկը։

Նշենք, որ հարյուրավոր ոստիկաններ հետևել են երթի ողջ ընթացքին, մասնավորապես, ՊԵԿ-ի մոտ պատ են կազմել և փակել են շենքի տարածքը։ Նրանք թույլ չեն տվել ցուցարարներին մոտենալ շենքին, ինչից հետո նրանց ու ցուցարարների միջև քաշքշուկ է սկսվել։ Մի քանի ակտիվիստներ մոտեցել և ՊԵԿ-ի շենքի գլխավոր մուտքի դռներին են փակցրել նախաձեռնության թռուցիկները, սակայն ոստիկաններն անմիջապես պոկել են դրանք։

Ավելի ուշ, երբ ցուցարարները սկսել են առաջանալ, որոշ մասն էլ ճեղքել է ոստիկանական պատը և մոտեցել շենքին, ոստիկաններն ուժով հետ են մղել նրանց։