Epress.am Լուրեր Հայաստանից
«Orange Գրքի մրցանակ 2013-ի» ժյուրիի անդամ Արծվի Բախչինյանը Hayeli.am-ի հետ զրույցում հաստատել է, որ ընկերության ներկայացուցչի կողմից ճնշում է եղել, և ժյուրին չի քննարկել ցմահ ազատազրկման դատապարտված Մհեր Ենոքյանի «Դեպի ցմահ ազատատություն» պատմվածքը: «Այո՛, ճնշում եղել է: Մենք չենք քննարկել և չենք քվեարկել Մհեր Ենոքյանի գիրքը»,- ասել է Արծվի Բախչինյանը:
«Օրանժ» գրքի մրցանակի պատմվածքի ժանրում այս տարի ներկայացված էր նաև ցմահ դատապարտյալ Մհեր Ենոքյանի «Դեպի ցմահ ազատություն» ստեղծագործությունը, որը հայտնվել էր լավագույն եռյակում, սակայն մրցանակի չի արժանացել:
Մրցանակաբաշխությանն առնչվող «Հետքի» աղբյուրը, ով չի ցանկացել հրապարակել իր անունը, կայքի հետ զրույցում պատմել է, որ մրցույթի վերջին փուլում, երբ ավարտվել է օնլայն քվեարկությունը, և ժյուրին պետք է վերջնական որոշում կայացներ, «Orange Armenia» ընկերության մարքեթինգի տնօրեն Արամ Մկրտչյանը հանդիպել է ժյուրիի անդամներին և պահանջել Մհեր Ենոքյանի գործը «բաց թողնել» և քվեարկությունը կազմակերպել առանց այդ ստեղծագործության:
Աղբյուրը պատմել է, որ ժյուրիի անդամներն ընդդիմացել են՝ նշելով, որ դա միակ գործն է, որի օգտին բոլորը միահամուռ պատրաստվում էին քվեարկել: «Orange Armenia»-ի մարքեթինգի տնօրենը ի պատասխան նշել է, թե անձնապես ինքն էլ ոչինչ չունի այդ ստեղծագործության դեմ, բայց բոլորը գիտեն, թե իշխանության և թե հասարակության վերաբերմունքը այդ մարդու հանդեպ:
«Միգուցե անձնապես բոլորս էլ հավանում ենք նրա գործը, բայց կազմակերպության հեղինակությունն ընկնում է, երբ այդ կազմակերպությունը մրցանակ է տալիս մի մարդու, ով մարդասպան է ընկալվում»,- կայքի աղբյուրի փոխանցմամբ՝ նշել է Արամ Մկրտչյանը: