Home / Հայաստան / Պատգամավորների պահվածքից տուժած լրագրողներին կոչ են անում դիմել Էթիկայի հանձնաժողով

Պատգամավորների պահվածքից տուժած լրագրողներին կոչ են անում դիմել Էթիկայի հանձնաժողով

Լրագրողական կազմակերպությունները պատգամավորների անհարգալից վերաբերմունքի հանդիպած լրագրողներին կոչ են անում համապատասխան դիմումներ ներկայացնել ԱԺ Էթիկայի հանձնաժողով։ Այս մասին ասված է կազմակերպությունների համատեղ հայտարարության մեջ։

Հայտարարության հեղինակները նշում են, որ անցած շաբաթ կայացած ՀՀ Ազգային ժողովի քառօրյա նիստը առանձնացավ որոշ պատգամավորների ակնհայտ ագրեսիվությամբ ու անպարկեշտ վերաբերմունքով լրագրողների նկատմամբ։ Այսպես՝ մայիսի 19-ին, երբ «Ազատություն» ռադիոկայանի թղթակիցը փորձեց իմանալ ՀՀԿ-ական Շուշան Պետրոսյանի կարծիքը` օրեր առաջ Երևանի «Վերնիսաժ»-ի մոտ տեղի ունեցած հրաձգության մասին, վերջինս պատասխանելիս լրագրողներին ասաց. «Դուք բոլորդ անբարոյականներ եք»։ Մայիսի 21-ին ծայրահեղ գռեհկություն և լրագրողին ճնշելու մտայնություն դրսևորեց ԲՀԿ-ական Մելիք Մանուկյանը, որին մոտեցած «Հրապարակ» թերթի թղթակիցն ուզում էր պարզել, թե ինչ կարծիքի է նա կառավարության ներկայացրած ծրագրի մասին։ Մյուս օրը` մայիսի 22-ին, ՀՀԿ-ական Մհեր Սեդրակյանը փողոցային հայհոյանք հնչեցրեց` ի պատասխան «Tert.am» կայքի լրագրողի հարց ուղղելու փորձին։ Նույն օրը պատգամավոր Արայիկ Գրիգորյանը, գինովցած վիճակում, ակնհայտ անպարկեշտ վարվելակերպ դրսևորեց «Fnews.am» կայքի կին թղթակցի նկատմամբ, ինչի տեսագրությունը տեղադրված է «Armlur.am»-ում։

«Այս չորս պատգամավորներից միայն Շուշան Պետրոսյանը փորձեց այլ ԶԼՄ-ների միջոցով որոշ պարզաբանումներ ներկայացնել, սակայն դրանք համոզիչ չէին։ Իսկ «Ազատություն» ռադիոկայանի թղթակցին ներողություն հայտնելու նրա պատրաստակամությունն ամենևին էլ համարժեք չէր լրագրողներին հասցեագրված արտահայտությանը։ Ինչ վերաբերում է մյուս միջադեպերին, ապա ո՛չ Մելիք Մանուկյանը, ո՛չ Արայիկ Գրիգորյանը, ո՛չ էլ Մհեր Սեդրակյանը ներողություն հայցելու որեւէ քայլ չարեցին։ Ի դեպ, վերջինս անցած տարի նմանատիպ վարք դրսևորեց նաև «Ա1+»-ի թղթակցի հետ շփվելիս:

Դատապարտելի համարելով հիշյալ պատգամավորների ագրեսիվ և անպարկեշտ վարվելակերպը` մենք` ներքոստորագրյալներս, պահանջում ենք.

– ԱԺ ՀՀԿ եւ ԲՀԿ խմբակցություններից՝ քննարկման առարկա դարձնել այս միջադեպերը եւ իրենց գնահատականները ներկայացնել հանրությանը,

– ՀՀ դատախազությունից՝ սույն փաստաթուղթը Մհեր Սեդրակյանի մասով համարել հաղորդում հանցագործության մասին, եթե վերջինս հրապարակավ ներողություն չխնդրի «Tert.am»-ի լրագրողից։

Այդ միջադեպերից տուժած և անհարգալից վերաբերմունքի հանդիպած լրագրողներին կոչ ենք անում համապատասխան դիմումներ ներկայացնել ԱԺ Էթիկայի հանձնաժողով՝ վերոհիշյալ պատգամավորների վարքը քննարկելու համար։

Միաժամանակ լրագրողական հանրությանն առաջարկում ենք ցուցաբերել մասնագիտական համերաշխություն և, բարոյապես աջակցելով գործընկերներին, անհանդուրժող վերաբերմունք արտահայտել պատգամավորների անպարկեշտությունների առնչությամբ», – ասված է հայտարարության մեջ։

Հայտարարության տակ ստորագրել են․

ԽՈՍՔԻ ԱԶԱՏՈՒԹՅԱՆ ՊԱՇՏՊԱՆՈՒԹՅԱՆ ԿՈՄԻՏԵ

ԵՐԵՎԱՆԻ ՄԱՄՈՒԼԻ ԱԿՈՒՄԲ

ՄԵԴԻԱ ՆԱԽԱՁԵՌՆՈՒԹՅՈՒՆՆԵՐԻ ԿԵՆՏՐՈՆ (ՆԱԽԿԻՆ «ԻՆՏԵՐՆՅՈՒՍ»)

ԼՐԱԳՐՈՂՆԵՐԻ «ԱՍՊԱՐԵԶ» ԱԿՈՒՄԲ

ԲԱԶՄԱԿՈՂՄԱՆԻ ՏԵՂԵԿԱՏՎՈՒԹՅԱՆ ԻՆՍՏԻՏՈՒՏ – ՀԱՅԱՍՏԱՆ

ՀԱՆՐԱՅԻՆ ԼՐԱԳՐՈՒԹՅԱՆ ԱԿՈՒՄԲ

«ԼՐԱԳՐՈՂՆԵՐ ՀԱՆՈՒՆ ԱՊԱԳԱՅԻ» ՀԿ

ԳՈՐԻՍԻ ՄԱՄՈՒԼԻ ԱԿՈՒՄԲ