ԱՄՆ֊ն Հայաստանին համոզում է ճանաչել Կոսովոյի անկախությունը․ «ՀԺ»

ԱՄՆ-Հայաստան հարաբերությունների օրակարգում անսպասելի հարց է հայտնվել. ըստ այդմ՝ ԱՄՆ-ն փորձում է Հայաստանին համոզել, որ վերջինս ճանաչի Կոսովոյի անկախությունը: Այս մասին գրում է «Հայկական ժամանակ» թերթը՝ հղում կատարելով իր աղբյուրին։

Եթե նման բան տեղի ունենա, Հայաստանը կդառնա առաջին ոչ մերձբալթյան նախկին խորհրդային պետությունը, որ ճանաչում է Կոսովոյի անկախությունը, գրում է «ՀԺ»-ն:

Թերթի տեղեկություններով, Հայաստանը հետաքրքրվել է այս թեմայով. ՀՀ դիվանագետներն ամերիկացիներին ասել են, որ եթե Կոսովոն ճանաչի Ղարաբաղի անկախությունը, ՀՀ-ն էլ կճանաչի Կոսովոն:

«Վերջինիս կողմից Ղարաբաղի անկախությունը ճանաչելը չափազանց անհավանական է թվում, որովհետև Կոսովոն մահմեդական երկիր է: Այսուհանդերձ, դիտորդները նկատում են, որ այս երկրի վրա չափազանց մեծ է ԱՄՆ-ի ազդեցությունը, որն էլ դե ֆակտո նրա անկախության կնքահայրն է:

Այս թեման զգայուն է նաև հայ-ռուսական հարաբերությունների տեսանկյունից։ ՌԴ-ն Կոսովոյի անկախությունը չի ճանաչել, բայց ժամանակին փորձել է Հայաստանին համոզել, որ վերջինս ճանաչի Աբխազիայի և Հրվ. Օսիայի անկախությունը։ ՀՀ-ն, սակայն, մերժելու անխոցելի փաստարկ է ունեցել. դա կնշանակի փչացնել հարաբերությունները Վրաստանի հետ, որը, ըստ էության, կյանքի ճանապարհ է Հայաստանի համար»,- գրում է թերթը:

Մանրամասները՝ թերթի այսօրվա համարում