Home / Տեսանյութեր / ԱԺ֊ի մոտ լրագրողին հարվածելու դեպքի առթիվ, այնուամենայնիվ, քրեական գործ հարուցեցին․ «Փաստինֆո»

ԱԺ֊ի մոտ լրագրողին հարվածելու դեպքի առթիվ, այնուամենայնիվ, քրեական գործ հարուցեցին․ «Փաստինֆո»

Ազգային ժողովի մոտ «Ա1+»-ի լրագրող Մարինե Խաչատրյանի և ԱԺ անվտանգության ծառայության պետ Կարեն Հայրապետյանի միջև տեղի ունեցած միջադեպի փաստով, գլխավոր դատախազի որոշմամբ քրեական գործ կհարուցվի, հայտնում է «Փաստինֆո»-ն։

«Լրագրողի մասնագիտական օրինական գործունեությունը խոչընդոտելու դեպքի առթիվ` ՀՀ քրեական օրենսգրքի 164-րդ հոդվածի 1-ին մասի հատկանիշներով հարուցված քրեական գործն ընդունվել է ՀՀ հատուկ քննչական ծառայության վարույթ և կատարվում է նախաքննություն»,- կայքին հայտնել է ՀՔԾ մամուլի պատասխանատու Միքայել Ահարոնյանը:

Ավելի վաղ Հատուկ քննչական ծառայությունը հրաժարվել էր քրեական գործ հարուցել լրագրողին հարվածելու փաստի առթիվ։

Հիշեցնենք, որ սեպտեմբերի 9-ին, ժամը 16:30-ի սահմաններում «Հակահարված» արվետսագետների խմբի ներկայացուցիչները ակցիա են անցկացրել՝ ԱԺ-ի մուտքի վրա փակցնելով «Բարև Ռոբ» գրությամբ պաստառ: Դարպասից դուրս եկած ԱԺ անվտանգության ծառայության պետ Կարեն Հայրապետյանը հարձակվել է ակցիան լուսաբանող լրագրողների վրա՝ հարվածելով «Ա1+»-ի լրագրող Մարինե Խաչատրյանին և գցելով նրա ձեռքին եղած նկարահանող սարքը: Ապա նա կոպիտ տոնով և «դու»-ով է խոսել Epress.am-ի լրագրողի հետ՝ իր գործողությունները մեկնաբանելու ու ներկայանալու պահանջին ի պատասխան՝ հայտարարելով. «Ինչ եմ անում որ, շատ գիտեմ ով ա [նկատի ունի Մարինե Խաչատրյանին]»։