Home / Հայաստան / Գնդակոծության պատճառով փակ է Վրաստան տանող ճանապարհի Բաղանիս-Ոսկեպար հատվածը․ Aravot.am

Գնդակոծության պատճառով փակ է Վրաստան տանող ճանապարհի Բաղանիս-Ոսկեպար հատվածը․ Aravot.am

Հունվարի 11-ի երեկոյան փակվել և այժմ էլ փակ է Հայաստան-Վրաստան միջպետական ավտոճանապարհի Բաղանիս-Ոսկեպար հատվածը, հայտնում է Aravot.am-ը։ Կայքի փոխանցմամբ՝ Բաղանիսի և Ոսկեպարի տարածքում ճանապարհային ոստիկանության աշխատակիցները հսկողություն են իրականացնում:

Երթևեկությունը կատարվում է  շրջանցիկ՝ Հարսնաքարով ձգվող ճանապարհով: Բաղանիս համայնքի ղեկավար Նարեկ Սահակյանը Aravot.am֊ին հայտնել է, որ երեկ երեկոյան ադրբեջանցիների գնդակոծությունից վնասվել է գյուղի երկու առանձնատուն: Գնդակները վնասել են պատերը, պատուհանների շրջանակները, ջարդել դրանց ապակիները:

ՀՀ ՊՆ մամուլի խոսնակ Արծրուն Հովհաննիսյանը երեկ հայտնել էր, որ Բաղանիս գյուղի հատվածում երեկ դիվերսիոն առաջխաղացում է կասեցվել, որի հետևանքով սպանվել է ադրբեջանական բանակի զինծառայող։

Ըստ ՀՀ ՊՆ ներկայացուցչի՝ դիվերսիոն խմբի գործողությունները չեզոքացվել են, իսկ հակառակորդի դիվերսիոն խմբի մեկ անդամի դիակը մնացել է միջդիրքային տարածքում:

Փոխհրաձգության ընթաքցում զոհվել է նաև տարածքում գտնվող 79-ամյա հովիվ Սերյոժա Սարգսյանը:

Այսօր Արծրուն Հովհաննիսյանը Epress.am-ին հայտնել է, որ հայկական կողմը թույլատրել է ադրբեջանցիներին միջդիրքային տարածքից հանել դիակը:

Ադրբեջանի ՊՆ մամուլի խոսնակ Վագիֆ Դերգյահլին ադրբեջանական ԶԼՄ֊ների հետ զրույցում հերքել էր զոհված ադրբեջանցի զինծառայողի մասին տեղեկատվությունը։