Գյումրիում ձերբակալված երիտասարդին արձանագրությունները չեն տրամադրել․ փաստաբան

Երեկ որպես վկա Գյումրիի ոստիկանություն կանչված, այնուհետև ձերբակալված Մնացական Ալեքսանյանին չեն տրամադրել իր նկատմամբ կատարված քննչական գործողությունների արձանագրությունները: Այս մասին այսօր Epress.am-ի հետ հեռախոսազրույցում ասել է Ալեքսանյանի փաստաբան Հայկ Հարությունյանը, ով 10։30-ի դրությամբ գտնվում էր Գյումրիի քննչական բաժնում: Փաստաբանը դիմում է գրել, որպեսզի իրենց կողմին տրամադրեն փաստաթղթերի փաթեթը, այդ թվում՝ ձերբակալման արձանագրությունը, և որոշումը, թե ինչի մեջ են կասկածում Ալեքսանյանին։

«Մոտ 1 ժամ ինձ թույլ չէին տալիս մտնել: Ես գնացի Ալեքսանյանի մոտ, խնդրեցի ինձ տալ փաստաթղթերը, նա ասաց, որ իրեն չեն տրամադրել»,-ասել է Հայկ Հարությունյանը:

Փաստաբանն ասել է՝ միակ բանը, որ իրենց հայտնի է, այն է, որ Ալեքսանյանը ձերբակալվել է հունվարի 15-ի դեպքերի առնչությամբ խուլիգանության և իշխանության ներկայացուցչի նկատմամբ բռնություն կիրառելու հոդվածներով հարուցված քրեական գործի շրջանակներում։ Այս պահին երիտասարդը գտնվում է Ձերբակալվածների պահման վայրում:

Երեկ Ալեքսանյանը, հրավիրվելով որպես վկա, ցուցմունք է տվել, որից հետո նրան տեղեկացրել են, որ ձերբակալված է: Ինչպես իր ֆեյսբուքյան էջում գրում է լրագրող Լևոն Բարսեղյանը, Ալեքսանյանին 13 ժամ շարունակ հարցաքննել էին նաև հունվարի 17-ին։

Հունվարի 15-ին Գյումրիից մի քանի լրատվական կայքերի կողմից հեռարձակված կադրերից երևում էր, թե ինչպես է երիտասարդը զրուցում ՀՀ ԱԺ «Ժառանգություն» խմբակցության պատգամավոր Զարուհի Փոստանջյանի հետ: Ալեքսանյանը հանդիմանում էր պատգամավորին այն բանի համար, որ վերջինս ոստիկանության մեքենա էր նստել:

«Մի հատ հարց, ճի՞շտ եք գտել ոստիկանության մեքենայով հայտնվել Գյումրու փողոցներում։ Իմ հարցին դրական կամ բացասական պատասխանեք։ Ցանկացած լեննականցու մի հատ ասեիք՝ ինձի տարեք Լոնդոն, ձեզ կտաներ, բայց շան ավտո չնստեիք», – ասել էր Ալեքսանյանը։

Հունվարի 15-ին հազարավոր մարդիկ դուրս էին եկել Շիրակի մարզի դատախազության շենքի մոտ՝ պահանջելով ՀՀ իրավասու մարմիններին հանձնել Ավետիսյանների ընտանիքի 7 անդամների սպանության մեջ մեղադրվող ռուսաստանցի զինծառայող Վալերի Պերմյակովին: Մարդկանց մի մասը երթով գնացել էր դեպի ՌԴ հյուպատոսություն, նրանց ճանապարհը փակել են ոստիկանները, սկսվել են բախումներ: Հետագայում իշխանության ներկայացուցչի նկատմամբ բռնություն կիրառելու հոդվածով հարուցվել էր քրեական գործ, սակայն մինչ օրս ձերբակալվածներ չկային։ Որպես վկա Գյումրիում հարցաքննվում էին երթի մասնակիցներից շատերը։