Կառավարությունը տարկետում տալու է միայն «հանճարեղներին»․ ուսանողները վերսկսել են հացադուլը

Ակադեմիական տարկետման իրավունքի վերացման դեմ պայքարող «Հանուն գիտության զարգացման» նախաձեռնությունը հայտարարում է Կառավարության հետ բանակցությունների անարդյունավետ լինելու, հետևաբար՝ դրանք դադարեցնելու և անժամկետ հացադուլ վերսկսելու մասին։ Նախաձեռնության 2 անդամներ հացադուլը վերսկսել են Երևանի պետական համալսարանի Կիրառական մաթեմատիկայի ֆակուլտետի մասնաշենքում՝ պահանջելով պահպանել ակադեմիական տարկետումը։

Ուսանողները հայտարարել են, որ Կառավարության առաջարկած լուծումը, այն է՝ «բացառիկ» և «հանճարեղ» ուսանողներին միայն տալ տարկետման հնարավորություն, չի բավարարում իրենց պահանջները։

«Մեկ ամիս տևած բանակցությունները չտվեցին ոչ մի արդյունք։ Նախկինում եթե նշվում էր, որ օրենքի 22-րդ հոդվածի 5֊րդ կետը, որը նախատեսում է Կառավարության որոշման տարկետման տրման հնարավորություն, կիրառելի է միայն այն ուղղությունների դեմքում, որոնք գերակա են ռազմաարդյունաբերական համալիրի տեսանկյունից, և [դա] կկիրառվի միայն այն ուսանողների դեպքում, ովքեր կդիտարկվեն հանճարեղ և բացառիկ։ Նշենք, որ Պաշտպանության նախարարությունը և Կրթության նախարարությունը չգիտեն՝ հանճարեղ ասելով՝ ում նկատի ունեն։ Այդ պատճառով մենք կարծում ենք՝ 5-րդ կետը պարունակելու է կոռուպցիոն ռիսկեր»,֊ իր ֆեսյբուքյան էջի միջոցով պարզաբանել է նախաձեռնության անդամ Դավիթ Պետրոսյանը։

Ուսանողը նշել է, որ իրենց կառուցողական առաջարկները, որոնք և՛ կոռուպցիոն ռիսկերից ձերբազատմանը, և՛ զինծառայության ու կրթության համատեղելիության ապահովմանն էին ուղղված, չեն ընդունվել Կառավարության կողմից։