Գլխավոր / Բանակ / Մահացած զինվորի հարազատները պաշտոնյաների հրաժարականներ են պահանջում. armtimes.com

Մահացած զինվորի հարազատները պաշտոնյաների հրաժարականներ են պահանջում. armtimes.com

Հոկտեմբերի 1-ին Մարտունու զորամասերից մեկում մահացած գյումրեցի զինվոր Գևորգ Հարոյանի հարազատները ՀՀ վարչապետ Նիկոլ Փաշինյանից պահանջում են ՀՀ Պաշտպանության նախարար Դավիթ Տոնոյանի, Արցախի նախագահ Բակո Սահակյանի և Արցախի Պաշտպանության նախարար Լևոն Մնացականյանի հրաժարականները, գրում է armtimes.com-ը:

Հոկտեմբերի 11-ին Գևորգի մորեղբայր Արմեն Բեգլարյանն իրազեկման ակցիա էր կազմակերպել Գյումրու սբ Հակոբ Մծբնա եկեղեցու բակում, որին մասնակցում էին նաեւ Գևորգի ընկերները: Մեկ անգամ ևս Արմենն ընդգծել է, որ Գևորգն ինքնասպանություն չի գործել, չի ինքնավնասվել, Գևորգին սպանել են, և դրա համար պետք է շատերը պատասխան տան:

«Խնդիրը մենակ իմ խոխան չի, բոլորի երեխաներն էլ ապրելու իրավունք ունեն: Փաշինյան ջան, դուն ասիր բոլորիս երեխեքը հավասար են, բոլորին տանենք բանակ, տարանք, ու՞, վերջը՞: Բոլորս էլ գիտենք, թե ընդեղ ինչ ա կատարվում, մենք մեր ձեռով մեր երեխեքին տանում ենք, ու վարի ենք տալիս: Ռուլետկա եք սարքել, ժեռեբյովկա եք սարքել, ուսկի ռուլետկա: Վեկալեցիր, քաշեցիր, ընկար, գնացիր: Թող էսի վերջին երեխան, վերջին զոհը լինի էս ձեւով գնացած: Եթե Դուք չեք կարող էս հարցը լուծեք, ասեք: Էդ մի Մանվել բռնեցիք տուշոնկա ուտող, էլ լեփողներ չկայի՞ն, կան, էդ լեփողները էլի նստած են նույն տեղերը, էլի լեփում են, մենք էլ էշի պես մեր երեխոցն ուղարկենք, որ գեներալնին իրանց լավ զգա՞ն, կայֆավատ անին, իրեք հատ լյուբովնիցա պահի՞ն», — ակցիայի ընթացքում ասել է Արմենը:

Գևորգին մայրը դեպքից 1 օր առաջ էր տեսել: Տղան եղել է ընկճված, առանց հագուստների, կոպը կապտած, գլխին էլ՝ սպի. «Մերը տեսել ա, ասել ա՝ Գեւորգ ջան, հենց հմի մտնում եմ պետի մոտը, Գեւորգն ասել ա՝ չէ, մամա ջան, բան չասես: Էդ րոպեին, որ Արմինեն ուզել ա մտնի պետի մոտը, մեկ էլ մի գիրք են տվել  КПП-ում, էդ էլ թազա ձև ա, որ ծնողը իրա կարծիքը գրի, լավ ա, վատ ա, ինչ ա: Արմինեն ասում է՝ էդ մոմենտին զամպալիտը ֆաշիստի պես կանգնած էր, երեխես մի տեսակ լարվեց, ասեց՝ մամա ջան, մենակ գոհ ու շնորհակալ գրի»:

Ըստ Արմենի, այն, որ Մարտունու այդ զորամասում անմարդկային պայմաններ են, Գևորգից բացի ուրիշներից էլ են իմացել: Վիճակահանությամբ է Գևորգն այդ զորամասում հայտնվել: Կարճ ժամանակ անց տղան տեղեկացրել է, որ անհնար է ոչ թե ծառայելն այնտեղ, այլ՝ ապրելն ու կենդանի մնալը:

Արմենն ասում է՝ իրենք իրենց հետաքննությունն են անելու, ներքին շատ ինֆորմացիաների են տիրապետում, ժողովուրդը պետք է հասկանա՝ ով ով է, պետք է գիտենա՝ ինչ բանակ ունենք: Ո՞վ գիտի, որ այս մեկ շաբաթում 10 զինվոր է մահացել: Մեր երեխեքին թուրքը չի սպանել, այ ցավներդ տանեմ: Էն օրն էլ պաշտոնավորներից մեկի երեխեն ոտաբոբիկ փախել ա չաստից, աֆիցեռները մեքենայով ընկել են հետևից, եկել, ընկել ա Ֆիզուլիի չաստը, մի կերպ զանգել ա թե՝ հոպար ջան, արի ինձ տար, սպանում են, է»:

Արմենի խոսքով՝ նամակ են գրել, հանձնել նաեւ վարչապետի կնոջը՝ Աննա Հակոբյանին, ամեն ինչի մասին նամակում մանրամասն պատմել են, բայց ոչ մի արձագանք չեն ստացել.

«Նամակը դրել ենք Աննա Հակոբյանի մոտը: 3 օր ա անցել, պատասխան չկա: Էսօր շատերը կմիանային մեզ, բայց դեռ ոչ ծնող ա ելել, ոչ ուրիշ մարդ, ասեցին՝ ֆրանկոֆոնիա ա գնում, մի խանգարեք: Բայց Ղարաբաղը կանգնած ա, Էջմիածինը կանգնած ա, սաղ էլ էս հարցը բարձրացնելու են: Ֆրանկոֆոնիա ենք անում ինչի՞ համար, որ էս ժողովրդին խաբենք, թե մենք լավն ե՞նք: Ասում ենք՝ լավ բանակ ունե՞նք, չկա ըտենց բան, կանչի, ամեն ծնող, ամեն տղա, ամեն նորմալ մարդ, կելնենք, կգանք, մենք կծառայենք, երկու տարի ա պետքը, մենք կծառայենք, բերեք մաքրենք»:

Բողոքողը նշել է՝ հենց վերադառնա Արցախ, այս հարցն այլ ձեւաչափով կբարձրացնեն: Սա միայն Գեւորգի խնդիրը չէ, բոլոր տղաներին պետք է փրկել: Այս պահին արդարության հասնելու իրենց ճանապարհին վարչապետ Նիկոլ Փաշինյանի աջակցությունն են պահանջում:

«Փաշինյան ջան, դու Գյումրիից սկսեցիր քու ամեն ինչը, ու սաղը կանգնեցին քու կողքը, բա հիմա չես ասու՞մ մին տեսնիս, թե էս ինչ ա կատարվում: Ոչ մի բան չես փոխել, ոչ մի բան չի փոխվել, ասում են, թե ցար նե նաստայաշի, հիմի իմանանք դու էլ նաստայաշի ես, թե չե՞ս նաստայաշի»,-ասել է Արմենը: