Նախկին ոստիկանապետի ու նրա ընտանիքի գույքը կարող է բռնագանձվել

Գլխավոր դատախազությունը, դեկտեմբերի 2-ին դիմել է դատարան՝ Հայաստանի նախկին ոստիկանապետ Վլադիմիր Գասպարյանի ու նրա ընտանիքի անդամների ապօրինի գույքի բռնագանձման պահանջով` տեղեկանում ենք DataԼex  հարթակից։

Գասպարյանի գույքի վրա արգելանք էր դրվել դեռևս այս տարվա հունիսի 30-ին։ Քրգործով, նախկին ոստիկանապետից բացի, անցնում են նաև նրա կինը՝ Սուսաննա Գասպարյանը, մայրը՝ Անժելա Գասպարյանը, որդին ու դուստրը՝ Անգելինա և Վլադիմիր Գասպարյանները, զոքանչը՝ Հեղուշ Գալստյանը։

Հեղուշ Գալստյանը, օրինակ,  60% բաժնեմաս ունի պահածոյացված ծովամթերքի, այլ պահածոների, նաև՝ հյութերի արտադրությամբ զբաղվող «Գալիլիա» ՍՊԸ-ում, իսկ մինչև 2018 թվականը եղել է դրա միանձնյա սեփականատերը։ Բացի այդ՝ ընտանիքի անդամները տիրապետել են Երևանում և մարզերում գտնվող մեծածավալ անշարժ գույքի։

Գլխավոր դատախազի խորհրդական Գոռ Աբրահամյանը «Լուրեր»-ի հետ զրույցում ասել է, որ դատարանն արդեն վարույթ է ընդունել գործը, սակայն թե կոնկրետ որ գույքը կարող է բռնագանձվել՝ դեռևս հստակ չէ։։