Հովիկ Աբրահամյանի խորհրդականին ազատել են տոկոսով փող տալու պատճառով
Անցած շաբաթ հայտնի դարձավ, որ Ազգային Ժողովի նախագահ Հովիկ Աբրահամյանի խորհրդական Թաթուլ Մանասերյանը աշխատանքից ազատվելու դիմում է ներկայացրել: Որոշման դրդապատճառների մասին գրում է «Չորրորդ ինքիշխանությունը»:
Իր որոշումը նա պատճառաբանել էր գիտական աշխատանքի անցնելու ցանկությամբ, հիշեցնենք` Թաթուլ Մանասերյանը տնտեսական գիտությունների դոկտոր է, «Այլընտրանք» հետազոտական կենտրոնի հիմնադիրը: «ՉԻ» տեղեկություններով, իրականում Թաթուլ Մանասերյանը ոչ թե ինքն է իր կամքով հրաժարական ներկայացրել, այլ նրան դա հուշել է Հովիկ Աբրահամյանը: Մեր տեղեկություններով, Հովիկ Աբրահամյանին լուրեր են հասել, թե իր խորհրդականը ԱԺ աշխատակիցներին տոկոսով փող է տալիս: Վերջինս, երբ համոզվել է, որ դա իրականում էլ այդպես է, իր մոտ է կանչել Մանասերյանին` նրանից պահանջելով անմիջապես դիմում գրել և հեռանալ աշխատանքից: Մանասերյանն էլ ի կատար է ածել վերադասի հրամանը:
