Home / Հայաստան / Առևտրականները քաղաքապետարանից խնդրել են իրենց տեղ հատկացնել Գրիգոր Լուսավորիչ եկեղեցու մոտ

Առևտրականները քաղաքապետարանից խնդրել են իրենց տեղ հատկացնել Գրիգոր Լուսավորիչ եկեղեցու մոտ

Տիգրան Մեծ պողոտայում բացօթյա առևտրով զբաղվող քաղաքացիները երեկ Երևանի քաղաքապետարանի առևտրի և սպասարկումների բաժնի առաջատար մասնագետ Արման Հովհաննիսյանի հետ շրջում էին պողոտային հարող տարածքներում` առևտուրն իրականացնելու համար հարմար վայր ընտրելու նպատակով:

Նշենք, որ ավելի վաղ Երևանի քաղաքապետարանը առաջարկել էր առևտրականներին շարունակել աշխատանքը Մալաթիայի շուկայում, սակայն Epress.am-ի հետ զրույցում վերջիններս նշել են, որ մեծ շուկաներում առևտուր չի լինում և իրենք կարծում են, որ դա իրենց համար այնքան էլ հարմար տարբերակ չէ:

Բացօթյա առևտուր իրականացնող քաղաքացիների հետ այս հարցը քննարկելուց հետո Երևանի քաղաքապետարանի մեկ այլ ներկայացուցիչ ասել է, որ Մալաթիա շուկայում տեղ կա, և խոստացել է հաջորդ օրը, այսինքն` արդեն այսօր,  առևտրականների  հետ  միասին գնալ շուկա և այնտեղ  նրանց համար տեղ գտնել: Սակայն խոստումը կյանքի չկոչվեց: Ինչպես մեզ հայտնեցին բացօթյա առևտուր իրականացնողները, քաղաքապետարանի աշխատակիցն այսօր այդպես էլ իրենց չի այցելել:

Առևտրականները նշեցին, որ վստահ էին, որ նա չի գալու, քանի որ առաջին անգամ չէ, որ պաշտոնյաները իրենց խոստումը չեն կատարում: Առևտրականները տեղեկացրեցին նաև, որ վաղը պատրաստվում են դիմում տանել քաղաքապետարան, որով առաջարկելու են իրենց համար տեղ հատկացնել Գրիգոր Լուսավորիչ եկեղեցու ներքևի հատվածում` պաղպաղակ վաճառողների կողքին:

Tekali Taxi