Home / Հայաստան / «Թող կոտրվի էն ձեռը». Առևտրականներին քշում են Վերնիսաժին հարող տարածքից

«Թող կոտրվի էն ձեռը». Առևտրականներին քշում են Վերնիսաժին հարող տարածքից

«Ինչով պիտի ապրի էս ժողովուրդը, մի կտոր հացի փող ենք աշխատում էս տարածքում, ինչ են ուզում մեզնից», – այսօր Վերնիսաժին հարող տարածքում` Հանրապետության փողոցից դեպի «Հանրապետության հրապարակ» մետրոյի կայարանն ընկած հատվածում, մանր առևտուր իրականացնող մարդկանց արգելում էին աշխատել:

Առևտուր իրականացնող մարդկան խոսքերով` այդ տարածքը ինչ-որ մեկը գնել է և պատրաստվում է սրճարան կառուցել:

«Թող կոտրվի էն ձեռը, որ 5000-ով ընտրեց էդ մարդկանց, դրա դիմաց մենք երեք մատ ենք ստանում այսօր, թող բոլորն իմանան` ում ընտրեցին: Էս ի՞նչ վիճակ ա, ո՞ւր եք տանում մեզ: Մենք դիմում ենք քաղաքապետին, որ թողնի աշխատենք, մինչև երկրի վիճակը բարելավվի, թե չէ մենք ու մեր երեխաները սոված կմնան: Սա վիճակ չի: Մենք էն վիճակի ենք հասել, որ ոստիկանությանը չենք հավատում, սրիկա դատավորներին չենք հավատում, ո՞ւր եք տանում մեզ»,- Epress.am-ի հետ զրույցում իր բողոքն է հայտնել Սամվել Սիմոնյանը, ով 14 տարի շարունակ աշխատել է այդ տարածքում:

Նա պատմել է, որ իրենք երեկ կառավարության դիմաց են եղել, և ՀՀ վարչապետի ներկայացուցիչն իջել և հանդիպել է իրենց հետ` հայտնելով, որ վարչապետը որևէ կապ չունի քաղաքապետարանի հետ:

«Ասում ա` չէ, մենք քաղաքապետարանի հետ գործ չունենք, տերիտորիան քաղաքապետարանինն է, ոնց ուզում անում են», – ասել է Սիմոնյանը:

«75 տարեկան մարդ եմ, մենակ եմ ապրում, վարձով, ոտերս նայեք, անձրևին գալիս, կանգնում եմ, որ մի կտոր հաց ուտեմ, ինչ են ուզում մեզնից: Իմ տանս ապրանքն եմ ծախում, իմ ձեռիս գործիքներն եմ ծախում»,- ասել է Ստեփան Եղյազարյան անունով մի մարդ, ում աչքերը պատմելու ընթացքում արցունքներով էին լցված:

Նշենք, որ առևտրով զբաղվող մարդիկ դեռևս չէին որոշել իրենց հետագա անելիքները:

Tekali Taxi