Home / Հայաստան / Եհովայի վկայի օգտին վճիռը կստիպի՞ մտածել Հայաստանում պրոֆեսիոնալ բանակի ստեղծման մասին

Եհովայի վկայի օգտին վճիռը կստիպի՞ մտածել Հայաստանում պրոֆեսիոնալ բանակի ստեղծման մասին

«Եհովայի վկաներ» կրոնական կազմակերպության անդամ Վահան Բայաթյանի գործով Եվրոպական դատարանի` Հայաստանին 20 հազար եվրո փոխհատուցումը պարտավորեցնելու մասին որոշումը կարող է շատ հետաքրքրիր զարգացումների բերել, առնվազն տարատեսակ քննարկումների մակարդակով:

Epress.am-ի հետ զրույցում այս մասին ասել է Հելսինկյան Ասոցիացիայի Վանաձորի գրասենյակի ղեկավար Արթուր Սաքունցը` նշելով, որ նման նախադեպը բարենպաստ ազդեցություն կունենա մի քանի գործոնների վրա:

«Առաջինն այն է, որ որոշակի ազդեցություն կունենա Հայաստանի դատական համակարգի վրա, և վերջապես նրանք կհասկանան, որ մարդուն չի կարելի դատապարտել ազատազրկման խղճի ազատության համար»,- նշել է Սաքունցը:

Որպես երկրորդ գործոն մեր զրուցակիցը նշել է այն հանգամանքը, որ Հայաստանի Հանրապետությունում կսկսի «վերակենդանանալ» այլընտրանքային զինծառայության մասին «մեռյալ» օրենքը՝ այն կլինի իրականում գործող այլընտարնքային զինծառայության մասին օրենք և ոչ թե թղթի վրա գրված մի բան:

«Ինչպես նաև այս հանգամանքը կարող է նախադեպ հանդիսանալ, որպեսզի Հայաստանի Հանրապետությունը սկսի մտածել ոչ պարտադիր՝ պրոֆեսիոնալ բանակի ստեղծման մասին: Ղարաբաղի պատերազմի փորձը գոնե ցույց է տվել, որ այնտեղ հաղթանակի գրավականը թվաքանակը չէր: Անհրաժեշտ է հասկանալ, որ ազգային անվտանգության հարցում կարևորը թվաքանակը չէ, այլ պրոֆեսիոնալ զինտեխնիկան, զինվորականների պրոֆեսիոնալ պատրաստվածությունը»,- նշել է Սաքունցը:

Նա, սակայն, մտավախություն է հայտնել, որ ունենալով Եվրոպական դատարանի որոշումը «Ա1+»-ի գործով, հնարավոր է, որ այս դեպքում էլ ՀՀ-ի կողմից պարտավորության կատարումը թերի լինի:

«Իհարկե, կա այս մտավախությունը, բայց մենք ամեն ինչ պետք է անենք, որ Հայաստանի համար Եվրոպական դատարանի որոշումները պարտադիր կատարման ենթակա լինեն»,- ասել է իրավապաշտպանը:

Հիշեցնենք, որ երեկ Մարդու իրավունքների եվրոպական դատարանի (ՄԻԵԴ) Մեծ պալատը ձայների մեծամասնությամբ (16 կողմ, 1 դեմ) վճիռ է կայացրել, համաձայն որի Հայաստանը խախտել է Եհովայի վկա Վահան Բայաթյանի խղճի ազատության իրավունքը, ով դատապարտվել և ազատազրկվել էր զինծառայությունից հրաժարվելու համար: Հայաստանի Հանրապետությանը պարտավորեցրել են Բայաթյանին վճարել 10 հազար եվրո որպես ոչ նյութական վնասի փոխհատուցում և 10 հազար եվրո որպես ծախսերի փոխհատուցում:

Tekali Taxi