Home / Հայաստան / Փուչիկների գործով մեղադրվող մարդն ասում է, որ հոգնել է. «Չեք պատկերացնում, թե ինչ ծանր ա»

Փուչիկների գործով մեղադրվող մարդն ասում է, որ հոգնել է. «Չեք պատկերացնում, թե ինչ ծանր ա»

Սերոբ Բոզոյանը, ով մեղադրվում է անվտանգության պահանջներին չհամապատասխանող ապրանքներ թողարկելու և իրացնելու մեջ` կապված մայիսի 4-ին ՀՀԿ համերգ-հանրահավաքին պայթած փուչիկների հետ, երևանյան փողողներից մեկի մայթեզրին նստած բերանով, այլ ոչ թե գազով փուչիկ է փչում և վաճառում, գրում է «Հայկական ժամանակ» օրաթերթը:

Թերթի թղթակիցը երեկ գտել է Բոզոյանին, ում ազատել են չհեռանալու մասին ստորագրության դիմաց, և զրուցել է նրա հետ:

«Այս մարդու «աշխատավայրը» միանգամից տրամաբանական մի շարք հարցեր է առաջացնում: Արդյո՞ք այս մարդը այդ վայրում կարող էր մի քանի հազար փուչիկ փչել, ու արդյո՞ք այդքան բարդ էր նրան գտնելը, որ ոստիկանությունը միայն հուլիսի 18-ին է նրան մեղադրանք առաջադրել, արդյո՞ք նա հայկական արդի արդարադատության համակարգում քավության հերթական նոխազը չէ», – գրում է թերթը:

«ՀԺ»-ի թղթակիցը նշում է, որ չափազանց խեղճ և վախեցած մարդը միանգամից հրաժարվել է պատասխանել հարցերին:

«Միակ բանը, որ նա կրկնել է` այն է, որ ինքը հոգնել է: «Ես չեմ ուզում խոսամ: Էս երեք ամսում հոգիս դուրս եկավ: Չեմ ուզում ոչ խոսամ, ոչ ինչ-որ բան ասեմ»: Արդյո՞ք իսկապես ինքն է փչել փուչիկները, եթե՝ այո, ապա` որտե՞ղ և ինչպե՞ս, արդյո՞ք ինքը գիտեր, որ փուչիկները լիցքավորում է վտանգավոր գազով, այդ ինչպե՞ս է ստացվել, որ ՀՀԿ-ն 7000 փուչիկ է պատվիրել հենց իր մոտ», – նշում է հոդվածագիրն` ընդգծելով, որ այս և մի շարք այլ հարցեր մնացել են անպատասխան:

Թերթը նաև ներկայացնում է Բոզոյանի հետ երկխոսությունն այն բանից հետո, երբ նա հրաժարվել է պատասխանել վերոնշյալ հարցերին:

– Ձեզ սպառնացե՞լ են, որ որևէ բան չասեք:

– Ի՞նչը պետք ա սպառնան: Ինչի՞ տեր եմ, որ ինչին էլ սպառնան: Հոգնել եմ արդեն ամեն ինչից, ուզում եմ` մեռնեմ գնամ: Չգիտեմ` ինչ անեմ:

-Արդա՞ր է, որ ձեզ մեղադրանք են առաջադրել:

-Էդ հետո կերևա:

-Դուք ձեզ մեղավոր համարո՞ւմ եք:

-Այ ցավդ տանեմ, ես ինձ վատ եմ զգում հիմա, չեմ ուզում խոսալ: Մեծ դժբախտություն է տեղի ունեցել: Ըտեղ դիտավորություն կա՞: Բոլորին էլ պարզ ա, որ դժբախտություն ա տեղի ունեցել: Վերևը Աստված կա, ինքը գիտի, թե ինչ ա եղել: Ես ի՞նչ կարամ անեմ: Չեք պատկերացնում, թե ինձ համար ինչ ծանր ա, ինչ դժվար ա:

– Ծանր է ու դժվար, քանի որ ձեզ մեղավո՞ր եք զգում, թե՞ ծանր է, որ ձեզ անարդարացի են մեղադրում:

– Ամեն ինչն էլ: Ամեն ինչն էլ:

– Ձեզ մեղավոր համարո՞ւմ եք այս դեպքի համար:

«Թղթակցի այս հարցին ի պատասխան` նա դառը ժպտացել է ու հեռացել է», – եզրափակում է թերթը:

Tekali Taxi