Epress.am Լուրեր Հայաստանից
Մոտ երկու տասնյակ հասարակական կազմակերպություններ, ովքեր զբաղվում են մարդու իրավունքների հիմնահարցերով Հայաստանում, իրենց մտահոգությունն են արտահայտել նույնասեռականների խնդիրներն արծարծող Parada ֆիլմի ցուցադրության անընդհատ հետաձգելու առթիվ, և այդ մասին բաց նամակ են հղել ՀՀ վարչապետին, Հայաստանում ԵՄ-ի ներկայացուցչությանը և Գերմանիայի դեսպանատանը:
«Ցանկացած ժողովրդավարական, սոցիալական, իրավական պետություն մարդու իրավունքների նման ոտնահարումը, մասնավորապես արտահայտման ազատության իրավունքի ոտնահարումը, որը ներառում է անկախ պետական սահմաններից ցանկացած միջոցով տեղեկություններ և գաղափարներ փնտրելու, ստանալու, տարածելու ազատությունը, պետք է համարի անթույլատրելի: Մենք պահանջում ենք, որպեսզի ՀՀ կառավարությունը ստանձնի իր պարտավորությունները և երաշխավորի սույն միջոցառման իրականացումը և դրա անվտանգությունը, համապատասխան դահլիճ տրամադրի ֆիլմի հանրային ցուցադրության, և հանդիսատեսի անխոչընդոտ դիտման համար:
Մենք գտնում ենք, որ ՀՀ իշխանության կողմից ձեռնարկած քայլերը կամ անգործությունը ԵՄ համար պետք է հանդիսանա ցուցանիշ, թե որքանով են իր տրամադրած աջակցությունը և միջոցները ուղղորդվում ՀՀ-ում մարդու իրավունքների իրավիճակի բարելավմանը: ԵՄ-ն պետք է հետամուտ լինի իր իսկ տրամադրած միջոցների նպատակային բաշխմանը և ՀՀ կողմից հանձն առած պարտավորությունների կատարմանը», – նշում են հայտարարության հեղինակները:
Հիշեցնեք, որ սերբ ռեժիսոր Սրդժան Դրագոյեվիչի «Parada» ֆիլմի ցուցադրությունը նախաձեռնել էին Եվրամիական Միություն պատվիրակությունը և Գերմանիայի դեսպանատունը: Սակայն դրա դեմ տեղի ունեցած ակցիաներից հետո Տիկնիկային թատրոնը և The Club ռեստորանը, որոնք նախապես համաձայնել էին ցուցադրության համար տեղ տրամադրել, հրաժարվել են դա անել: Հաջորդ տեղը, որ նախաձեռնողները գտել էին՝ «Կոնգրես» հյուրանոցն էր, սակայն ցուցադրության օրն այն ևս հրաժարվել է դահլիճ տրամադրել: