Բաքվում պաշարել են գրողի տունը. նա պատասխանել է. «Կարող ենք ապրել հայերի հետ»
Երեկ Բաքվում բողոքի ակցիա են կազմակերպել ժողովրդական գրող Աքրամ Այլիսլիի «Քարե երազներ» վեպի դեմ, որը նվիրված է Ադրբեջանում ապրած հայերին: Ակցիան կազմակերպել է իշխող «Ենի Ադրբեջան» կուսակցության երիտթևը: Երիտասարդները գրողի տան մոտ էին եկել «Ինչու է հայերի հետ ընկերություն անում», «Հայ Աքրամ, հեռացիր երկրից», ««Քարե երազները» զրպարտանք է» գրություններով պաստառներով: Ոստիկանությունը ակցիայի ընթացքը չի խոչընդոտել:
Այլիսլիի դեմ արշավին միացել է նաև «Ղարաբաղի ազատագրման կազմակերպությունը», որը նրան մեղադրել է «հայերին օժանդակելու» մեջ և կոչ է արել վտարել գրողին երկրից: Նրանք «Քարե երզաներ» վեպը ադրբեջանցիների դեմ սադրանք են անվանել և պնդել, որ վեպը «հայկական քարոզչամեքենայի պատվերն է»:
«Վեպում ադրբեջանցիներն ու թուրքերը մեղադրվում են իբր թե անմեղ հայերի ոչնչացման, վայրագությունների մեջ, ադրբեջանցիներին վերագրվում են հայերի կատարած ոճրագործությունները, ինչպես նաև անհիմն մեղադրանքներ են ուղղվում Իսլամի ու Մուհամեդ մարգարեի հասցեին: Փաստորեն, կատարվածի մեջ նա մեղադրում է իսլամը, իսկ իր դիրքորոշումը նա ներկայացնում է նրանով, որ վեպի հերոսը ուրանում է իսլամը և հանգրվան է գտնում քրիստոնեության մեջ», - ասված է կազմակերպության հայտարարության մեջ:
Ի պատասխան իր հասցեին հնչող քննադատությանը, գրողը հայտարարել է, որ իր վեպում Ադրբեջանի հասցեին որևէ վիրավորական բան չկա:
«Հակառակը՝ ես արտացոլել եմ ադրբեջանցիների վեհությունը: Ես ասել եմ, ապագայում մենք կարող ենք ապրել հայերի հետ, եկեք չայրենք կամուրջները: Սա քաղաքականություն չէ, ինձ համար այս քաղաքականացումն անհասկանալի է», - ասել է Այլիսլին:
Հիշեցնենք, որ վեպը նվիրված է Ադրբեջանում ապրած հայերին, իսկ նախաբանում ասված է. «Նվիրվում է իմ հայրենակիցների հիշատակին, ովքեր իրենցից հետո թողել են չսգացած ցավ»: «Քարե երազներում» զուգահեռներ են տարվում 1919թ. Ագուլիսում հայերի ոչնչացման և Սումգայիթում ու Բաքվում հայերի ջարդերի միջև:
«Ցավում եմ, որ Աքրամ Այլիսլին նման ստեղծագործություն է գրել ու այն հրապարակել ռուսերեն: Ինչի՞ համար է դա գրել: Հայ ֆաշիստներին սատարելու համա՞ր, որոնք չեն հերքում Խոջալուի ողբերգությունը և որոնք երեխաներին կենդանի փակում էին գազի խողովակներում և ավելի քան 250 հազ. ադրբեջանցի են քշել այդտեղից: Ի՞նչ է ուզում ասել ադրբեջանցի գրողը՝ նման վեպ հրատարակելով այն ժամանակ, երբ մենք միջազգային հանրությանն ենք փորձում հասցնել այս ամենը և հայերի հետ գաղափարական պատերազմ ենք տանում: Ցանկանում է Փամուկի պես Նոբելյան մրցանա՞կ ստանալ: Ուզում է ինչ-որ մեկին դո՞ւր գալ՝ խեղաթյուրելով սեփական ժողովրդի պատմությունը», – ասել էր «Ենի Ադրբեջան» կուսակցության գործադիր քարտուղարի տեղակալ, պատգամավոր Մուբարիզ Ղուրբանլին:
