Epress.am Լուրեր Հայաստանից
Քաղաքացիական ակտիվիստները «Մարտի 8–ն ամեն օր» բեմականացված քայլերթով շրջել են Երևանի կենտրոնում՝ շարունակելով Մարտի 8-ին նվիրված միջոցառումների շարքը, որը նպատակ ունի առիթն օգտագործել և բարձրաձայնել կանանց իրավունքների հիմնահարցերը:
Ակտիվիստները ներկայացմամբ հանդես են եկել նախ Իսահակյանի արձանի մոտ, ապա Ազնավուրի հրապարակում և Հյուսիսային պողոտայում: Բեմադրության հերոսը մեծ ընտանիքի մայր էր, ով իր վրա կրում է իր պարտականությունների մասին հայտնող գրառումներով թղթեր՝ «երեխա բերող», «տուն մաքրող», «զոռով սեքս անող», «ամենացածր աշխատավարձով աշխատող», «Կոնֆլիկտները հարթող»:
Հասարակության սևազգեստ անդամների կողմից ճնշումներից հետո՝ հերոսուհին կարողանում է իր մեջ ուժ գտնել, պատռել իր վրա փակցված թղթերը և ազատագրվել: Ներկայացման հերոսուհի Միլենան Epress.am-ի հետ զրույցում ասել է, որ գիտակցում է, թե հայ կնոջ համար այնքան հեշտ չէ ազատվել ճնշումներից ու իրավունքի ոտնահարումների դեմ պայքարել իրական կյանքում, ինչպես դա արվում է թատերական խաղում, բայց, նրա խոսքով՝ պետք է ձգտել անել հնարավորը՝ հասարակության լիարժեք անդամ դառնալու համար:
Ակտիվիստներին, որոնք, թմբուկ նվագելով, երգելով, թռուցիկներ բաժանելով (դրանց վրա նշված էր այսօրվա միջոցառումների ժամանակացույցը) անցնում էին փողոցներով, միացել են նաև հեծանվորդները, ում տոնական երթը կազմակերպել էր «Հեծանիվ պլյուս» ՀԿ-ն:
Ակտիվիստները նաև «Ընտանեկան բռնության մասին» օրենքը ճանաչելու կոչով պաստառ էին պատրաստել:
«Իհարկե, օրենքի ընդունումով միայն իրավիճակը չի փոխվի, ամեն ինչ փոխկապակցված է: Կանայք տնտեսապես անկախ չեն, մենթալիտետի հարց կա: Սակայն օրենքը կօգնի իրազեկումը բարձրացնել, կօգնի, որպեսզի կանայք բռնության ենթարկվելու դեպքում դիմեն ոստիկանություն, ազատվեն նախապաշարմունքներից»,- Epress.am-ի հետ զրույցում ասել է Կանանց ռեսուրսային կենտրոնի նախագահ Լառա Ահարոնյանը:
