Home / Տեսանյութեր / Քաղաքացուն համոզել են զինծառայող եղբոր դեմ հաղորդում գրել. գործը դատարանում է

Քաղաքացուն համոզել են զինծառայող եղբոր դեմ հաղորդում գրել. գործը դատարանում է

ՌՈ աշխատակիցը համոզել է քաղաքացի Սարգիս Մարգարյանին հաղորդագրություն գրել իր եղբոր՝ «Մեհրաբ» զորամասի զինծառայող Մանուկ Մարգարյանի դեմ, ով, երկու այլ զինծառայողների հետ միասին, մեղադրվում է իր վերադասի (անունը և պաշտոնը չեն հրապարակվում) նկատմամբ բռնություն կիրառելու մեջ:

Epress.am-ի հետ զրույցում փաստաբան Անի Թորոսյանը, ով գործով երկու ամբաստանյալների՝ եղբայրներ Կառլեն և Արտակ Սարգսյանների պաշտպանն է, այդ փաստը որակում է որպես պաշտոնի չարաշահում:

Ըստ փաստաբանի՝ երբ մեղադրյալ Մանուկ Մարգարյանին ձերբակալել են, Սարգիս Մարգարյանը հարցրել է իր ծանոթ ՌՈ աշխատակից Էրիկ Վարդանյանին, թե ինչպես կարող է օգնել եղբորը:

ՌՈ աշխատակիցը խորհուրդ է տվել հանցագործության մասին արձանագրություն գրել: Այդ արձանագրությունն այժմ առկա է գործի նյութերում:

Փաստաբանի խոսքով՝ արձանագրությունը կարգի համաձայն չի արվել. այն ոչ ամսաթիվ ունի, ոչ գրանցման համար:  Պաշտպանական կողմը՝ Անի Թորոսյանը և Մարգարյանի պաշտպան Վաղինակ Աթոյանը, դատարանում արդեն հայտարարել են, որ այդ արձանագրությունը չի կարող համարվել իրավական փաստաթուղթ, քանի որ ստացվել է ՌՈ աշխատակցի պաշտոնի չարաշահումով: Վերջինս ոչ միայն չի զգուշացրել, որ Սարգիսը հաղորդում է գրում իր եղբոր դեմ, այլև ասել է, որ դրանով ինքն օգնում է վերջինիս:

Տավուշի մարզի ընդհանուր իրավասության դատարանի դատավոր Ռաֆիկ Մելքոնյանը այս փաստին անդրադառնալու է վճիռ կայացնելու ժամանակ: Հաջորդ դատական նիստը կայանալու է Իջևանում՝ օգոստոսի 27-ին:

ՏԵՍԱՆՅՈՒԹԸ՝ Արման Վեզիրյանի, Հելսինկյան ասոցիացիա

Tekali Taxi