«Ոստիկանության ասածը սուտ է». ակտիվիստը պնդում է, որ չի բղավել ու հարբած չի եղել

Երևանի քաղաքապետարանի դիմաց նստացույց անցկացնող քաղաքացիական ակտիվիստ Վահագն Մինասյանի խոսքով՝ քաղաքապետարանի դիմաց իր պահվածքի մասին ոստիկանության հայտարարությունը բացարձակապես չի համապատասխանում իրականությանը:

Ըստ ոստիկանության հաղորդագրության՝ այս գիշեր ժամը 02:20-ի սահմաններում մոտենալով Երևանի քաղաքապետարանի դիմացի աստիճաններին՝ Մինասյանը գոռացել է, թե «ո՞ւր է ոստիկանը»:

«Ծառայություն իրականացնող ոստիկանները մոտեցել են Վահագնին՝ փորձելով պարզել, թե ինչ է կատարվում, ինչու է նա բղավում և աղմկում։ Պարզելով, որ քաղաքացին ալկոհոլի ազդեցության տակ է՝ ոստիկանները նախ փորձել են հանգստացնել նրան, կարգի հրավիրել, հետո էլ առաջարկել են իրենց օգնությունը, սակայն Վահագնը շարունակել է գոռգոռալ, ցավագին է ընդունել ոստիկանների դիտողությունները, անհարգալից վերաբերմունք դրսևորել»,- ասված է ոստիկանության հայտարարության մեջ:

Epress.am-ի հետ զրույցում Մինասյանն ասել է, որ ինքը չի եղել ալկոհոլի ազդեցության տակ, չի բղավել, ընդամենը քաղաքապետարանի աստիճաններին է մոտեցել և, լսելով մեքենայից դուրս եկող ոստիկանի հարցը, թե արդյոք խնդիր կա, ասել է, որ ուզում էր տեսնել՝ կա դրսում ոստիկան, թե՝ ոչ:

Երբ ոստիկանն ասել է, որ դրսում հերթապահողն ինքն է, Մինասյանը պատասխանել է, որ նա նոր է դուրս եկել մեքենայից:

Այդ պահին մեքենայի պատուհանը իջեցվել են, և ներսում գտնվող բարձրաստիճան մի ոստիկան կոպիտ է խոսել ակտիվիստի հետ՝ հորդորել է կարգի գալ: Վիճաբանությունն ավարտվել է Մինասյանին ոստիկանություն տեղափոխելով: Նա բացատրություն է գրել և հեռացել:

Ըստ ակտիվիստի՝ ոստիկանության սուտ հայտարարությունը հերթական փորձն է  վարկաբեկելու քաղաքապետարանի դիմաց նստացույց անցկացնողներին: Հիշեցնենք, որ հուլիսի վերջից նստացույց անցկացնող Գոռ Առաքելյանը, Սուրեն Սահակյանը և Վահագն Մինասյանը պահանջում են Երևանի քաղաքապետարանի տրանսպորտի վարչության պետ Հենրիկ Նավասարդյանի և «Երևանտրանս» ընկերության տնօրեն Միսակ Համբարձումյանի հրաժարականը: Երեք երիտասարդներին մի խումբ ակտիվիստներ են աջակցում: 

Լուսանկարը՝ Վահե Գևորգյանի Facebook-ի էջից