Epress.am Լուրեր Հայաստանից
ՀԱԿ խորհրդարանական խմբակցությունը դուրս է գալիս «Գազային հանձնաժողով» ստեղծելու՝ ԱԺ նախագահի նախաձեռնության քննարկման գործընթացից: Այս մասին հաղորդում է Ilur.am-ը:
ՀԱԿ խմբակցության ղեկավար Լևոն Զուրաբյանն կայքի հետ զրույցում ասել է, որ նման որոշման պատճառը ՀՀԿ-ի ապակառուցողական լինելն է:
Հիշեցնենք, որ, մերժելով ոչ կոալիցիոն ուժերի՝ գազի գնի հարցերը բացահայտելու հանձնաժողովի ստեղծման առաջարկը, ՀՀԿ խմբակցությունը՝ ի դեմս ԱԺ նախագահ Հովիկ Աբրահամյանի, առաջարկել էր այլ ձևաչափով հարցը քննարկել ԱԺ-ում:
Զուրաբյանի խոսքով՝ նման առաջին քննարկմանը ՀՀԿ-ական Դավիթ Հարությունյանը արել է այնպիսի առաջարկներ, որոնք էապես փոխել են ոչ կոալիցիոն ուժերի արած առաջարկների էությունը:
Մանսավորապես, Հարությունյանն առաջարկել է, որ հանձնաժողովի նիստերը դռնփակ լինեն և հանձնաժողովի անդամներն իրավունք չունենան մինչև վերջնական եզրակացության ներկայացումը, առանց հանձնաժողովի որոշման հրապարակել աշխատանքի ընթացքում ձեռք բերված տեղեկությունները:
Նա ընդգծել է, որ հարցը խմբակցություններում քննարկելուց և առաջարկները համաձայնեցնելուց հետո նման առաջարկների արծարծումը նաև բանակցությունների էթիկայի կոպիտ խախտում է:
«Մենք չենք կարող շարունակել բանակցություններն այս թեմայով մի ուժի հետ, որը րոպեն մեկ «փոշմանում է» և փոփոխում է իր դիրքորոշումը, առավել ևս, որ այդ փոփոխությունները ուղղված են հանձնաժողովի գործունեության հրապարակայնության դեմ: <…> Այս պահին Հայ ազգային կոնգրես խմբակցությունը (որոշումը խմբակցությունում ընդունվել է միաձայն), դուրս է գալիս ՀՀԿ-ական մեծամասնության հետ գազի հանձնաժողովի վերաբերյալ բանակցային գործընթացից և հանձնաաժողովի վերաբերյալ իր դիրքորոշումը կհայտնի այն բանից հետո, երբ վերջնական նախագիծը ներկայացվի ԱԺ-ի լիագումար նիստին», – ասել է Զուրաբյանը:
Հոդվածն ամբողջությամբ՝ այստեղ