Հայաստանում ՌԴ դեսպանին հիշեցրել են, որ նա իրավունք չունի միջամտել այլ երկրի ներքին գործերին

Դիվանագիտական հարաբերությունների մասին Վիեննայի Կոնվենցիայի 41-րդ․ հոդվածում ամրագրված է, որ դեսպանն իրավունք չունի միջամտել այլ երկրի ներքին գործերին։ Այս մասին Հայաստանում ՌԴ դեսպան Իվան Վոլինկինին (լուսանկարում) հիշեցնում է ԵՊՀ Միջազգային հարաբերությունների ֆակուլտետի ուսանող Դավիթ Հարությունյանը։ Նա բաց նամակ է հղել ՌԴ դեսպանին՝ կապված վերջինիս հարցազրույցի հետ։

««Ноев Ковчег» ռուսալեզու պարբերականին տված ձեր հարցազրույցում դուք ասել եք, որ պետք է զբաղվեք Հայաստանում գործող հասարակական կազմակերպությունների չեզոքացմամբ, որոնք ցանկանում են սեպ խրել ռուս–հայկական հարաբերությունների մեջ՝ օրինակ բերելով Ռուսաստանում ՀԿ-ների գործունեությունը կարգավորելու մասին նոր ընդունված օրենքը։

Կցանկանայի ձեր ուշադրությունը գրավել այն փաստի վրա, որ ՀԿ-ները չեն հանդիսանում միջազգային իրավունքի սուբյեկտ, հետևաբար նրանց գործողությունը չի կարող անմիջական ազդեցություն ունենալ դիվանագիտական հարաբերությունների վրա։ Ինչ վերաբերում է հայ–ռուսական բարեկամության դեմ ուղղված գործողություններին, ապա կարծում եմ, որ դրա դեմ պայքարի լավագույն միջոցն է հավասարը հավասարին դիվանագիտական հարաբերություններ վարելը, և ոչ թե Հայաստանի Հանրապետությունը դիտարկել կամայական ցանկություններ իրականացնելու վայր։ Ըստ Հայաստանի Հանրապետության Սահմանադրության, մարդն իրավունք ունի արտահայտել իր ազատ խոսքը։

Հետագայում այսպիսի խնդիրներից զերծ մնալու նպատակով, կցանկանայի ձեր և Հայաստանում այլ արտակարգ և լիազոր դեսպանների ուշադրությունը գրավել 1961թ․ ապրիլի 18-ին կնքված Դիվանագիտական հարաբերությունների մասին Վիեննայի Կոնվենցիայի 41-րդ․ հոդվածի 1-ին մասի վրա։ Ստորև ներկայացնում եմ վերը նշված հոդվածը․

ՀՈԴՎԱԾ 41 1.

Առանց վնասելու իրենց արտոնություններն ու իմունիտետները, այդ արտոնություններից և իմունիտետներից օգտվող բոլոր անձինք պարտավոր են հարգել նստավայր պետության օրենքները և որոշումները։ Նրանք նաև պարտավոր են չմիջամտել այդ պետության ներքին գործերին», – գրում է Դավիթ Հարությունյանը։

Նշենք, որ երեկ Վոլինկինի հայտարարությանն անդրադարձել էր ՀՀ ԱԳՆ մամուլի խոսնակ Տիգրան Բալայանը՝ ասելով, որ «որևիցե հասարակական կազմակերպություն ի զորու չէ սեպ խրել Հայաստանի և Ռուսաստանի միջև՝ երկու ժողովուրդների դարավոր բարեկամության վրա հիմնված և ժամանակի փորձությունն անցած, դաշնակցային հարաբերություններում։ Հայաստանում բոլոր կազմակերպությունները գրանցվում և գործում են ՀՀ օրենսդրության շրջանակներում»։