Հակոբ Ինջիղուլյանը ցանկանում է վերադառնալ Հայաստան․ Սեյրան Օհանյան

Ադրբեջանի իշխանությունների կողմից երրորդ երկիր հանձնված զինվոր Հակոբ Ինջիղուլյանը ցանկանում է վերադառնալ հայրենիք: Այս մասին լրագրողների հետ զրույցում ասել է պաշտպանության նախարար Սեյրան Օհանյանը, հայտնում է News.am-ը։

«Այժմ վերջնականապես լուծվում է երրորդ երկիր գնալու կամ Հայաստան վերադառնալու հարցը: Մեր ունեցած տվյալներով՝ Ինջիղուլյանը ցանկանում է հայրենիք վերադառնալ», – հայտարարե է Օհանյանը:

Հիշեցնենք, որ զինծառայող Հակոբ Ինջիղուլյանը 2013 թվականի օգոստոսի 7-ի լույս 8-ի գիշերը ծառայությունն իրականացնելու ընթացքում տեղանքում չկողմնորոշվելու հետևանքով հատել էր ղարաբաղա-ադրբեջանական շփման գիծը և հայտնվել հակառակորդի պահպանության տակ գտնվող տարածքում:

Ավելի վաղ Հակոբի մայրը՝ Գայանե Ինջիղուլյանը, Epress.am-ի հետ զրույցում ասել էր, թե դեռ հայտնի չէ՝ արդյոք որդին կցանկանա վերադառնալ հայրենիք, կամ արդյոք Կարմիր Խաչի միջազգային կոմիտեն թույլ կտա, որպեսզի իրենք՝ Հակոբի ընտանիքի անդամները, գնան հարազատին այցելելու։