Կարմիր խաչի ներկայացուցիչներն այցելել են Ադրբեջանում գերեվարված Հայաստանի քաղաքացուն

Կարմիր խաչի միջազգային կոմիտեի Բաքվի գրասենյակի ներկայացուցիչները հանդիպել են Ադրբեջանում գերության մեջ գտնվող ՀՀ քաղաքացի Սարգիս Անանյանին: Այս մասին «Արմենպրես»-ի հետ զրույցում հայտնել է ԿԽՄՀ երևանյան գրասենյակի հասարակայնության հետ կապերի բաժնի աշխատակից Հասմիկ Գալստյանը:

«Սեպտեմբերի 16-ին հանդիպում է եղել: Տեղի է ունեցել ընտանեկան հաղորդագրությունների փոխանակում»,- ասել է նա։

Ադրբեջանում գործող ԿԽՄԿ ներկայացուցիչները հայ գերուն առաջին անգամ այցելել են սեպտեմբերի 9-ին` գերության մեջ գտնվելու 13-րդ օրը:

Հիշեցնենք, որ ադրբեջանական ԶԼՄ-ները Հայաստանի քաղաքացու՝ սահմանն անցնելու մասին գրել էին դեռ օգոստոսի 26-ին, սակայն ՀՀ ոստիկանություն նշել էր, որ կորած անձի մասին հաղորդում չի ստացել։

Սեպտեմբերի 1-ին ադրբեջանական ԶԼՄ-ները հրապարակեցին Անանյանի նկարը, սակայն ՀՀ ոստիկանությունը դարձյալ նշել էր, որ Նոյեմբերյանի բնակչի կորելու մասին հաղորդում չի ստացել։

«Երբ Անանյանի նկարը հրապարակեցին ադրբեջանական ԶԼՄ-ները, ոստիկանությունը սկսեց քննություն տանել, երբ նրա քույրը ներկայացրեց բողոք, արդեն սկսվեց գործով նյութեր նախապատրաստվել»,- Epress.am֊ին ասել էր Ոստիկանության հասարակության հետ կապերի բաժնի ներկայացուցիչ Արմեն Մալխասյանը։