Խորհրդարանի ոչ իշխանական ուժերի քառյակը, իսկ այնուհետև նաև եռյակը երբևէ չեն քննարկել «Բարգավաճ Հայաստան» կուսակցության ղեկավար Գագիկ Ծառուկյանի` Հայաստանի նախագահի պաշտոնում առաջադրվելու հարցը: Այս մասին «Ազատության» հետ զրույցում հայտարարել է ԱԺ Հայ ազգային կոնգրես խմբակցության պատգամավոր Արամ Մանուկյանը:
«Մեր ամբողջ այս համագործակցության ընթացքում երբևէ այդպիսի հարց չենք քննարկել», – մասնավորապես, ասել է Մանուկյանը` պատասխանելով հարցին, թե տեղյա՞կ էին արդյոք Գագիկ Ծառուկյանի՝ իր թեկնածությունն առաջադրելու որոշմանը: Հիշեցենք, որ երեկ ԲՀԿ ղեկավարը հայտարարել էր, որ պատրաստ է առաջադրել իր թեկնածությունը նախագահական ընտրություններում։
Լրագրողի ճշտող հարցին, թե հնարավո՞ր է արդյոք, որ երեք ոչ իշխանական ուժերի համագործակցության արդյունքում պարզվի, որ նրանց՝ նախագահի միասնական թեկնածուն կարող է Գագիկ Ծառուկյանը լինել, Մանուկյանը կրկին արձագանքել է, որ «այդպիսի հարց օրակարգում չի եղել, չկա»:
«Այդպիսի հարց քառյակում կամ եռյակում բացարձակ երբևէ չի քննարկվել», – ասել է Մանուկյանը:
Նրա խոսքով՝ իրենք հանրահավաքներով պատրաստվում են արտահերթ ընտրությունների․ «Վիճակն այնքան լարված է, ցուցանիշները այնքան տագնապեցնող են, արտագաղթը այնքան ահագնացող է, որ շատ լուրջ մարտահրավերներ կան Հայաստանի ազգային անվտանգությանը սպառնացող, և քաղաքական ուժերը հենց այդ ելման կետից է, որ այս գործընթացն են սկսել»:
Պատգամավորը նաև նշել է, որ Ազատության հրապարակում կայանալիք հանրահավաքին արտաքին քաղաքական գործընթացներ չեն քննարկվելու:
«Շատ ավելի ուժեղ, դոմինանտ խնդրի առկայության պատճառով, այն է՝ Հայաստանի ներքին անվտանգությունը և ընդհանրապես գոյությունը, արտագաղթի այս պայմաններում, վտանգված է, և մեր խնդիրն է կասեցնել այս գործընթացը: Այդ առումով է, որ արտաքին մարտահրավերները գոնե այս հանրահավաքում քննարկման նյութ չեն լինելու: Այս շարժումը ոչ հակառուսական է, ոչ հակաեվրոպական է, ոչ պրո-ամերիկյան է: Սա Հայաստանի ներքին խնդիրների լուծման համար շարժում է», ֊ ասել է Մանուկյանը։