Գլխավոր / Տեսանյութեր / Սահմանամերձ գյուղերին աջակցելու անվան տակ իշխանավորներն իրենց բիզնեսին են օգնում․ Փաշինյան

Սահմանամերձ գյուղերին աջակցելու անվան տակ իշխանավորներն իրենց բիզնեսին են օգնում․ Փաշինյան

Սահմանամերձ գյուղերում գործարարներին արտոնություններ տալու մասին ՀՀ կառավարության նախագիծը, որը երեկ ներկայացվել է ԱԺ֊ում, դեռևս չի սահմանում, թե որ համայնքներում է կիրառվելու օրենքը:

Այս փաստը դժգոհություն է առաջացրել ԱԺ պատգամավորների մոտ նախագծի քննարկման ժամանակ: «Ժառանգություն» խմբակցության անդամ Թևան Պողոսյանը, մասնավորապես, հետաքրքրվել է, թե ինչպես է Կառավարությունը համայնքների վերաբերյալ վերլուծություն կատարել, եթե դրանց ցանկը դեռ չկա:

Թևան Պողոսյանի հարցին պատասխանելով՝ Ֆինանսների փոխնախարար Վախթանգ Միրումյանն ասել է, որ դեռ հստակեցված չէ նույնիսկ, թե ծրագիրը հարևան որ երկրի սահմանին մոտ գտնվող գյուղերին է վերաբերելու։ Փոխնախարարի խոսքով՝ ցանկում կարող են ընդգրկվել ինչպես ռազմական գործողություններից տուժած, այնպես էլ սոցիալական վատ պայմաններում գտնվող բնակավայրերը, որոնք սահմանակից են Վրաստանին, Թուրքիային ու Իրանին:

Թևան Պողոսյանը նկատել է, որ սահմանամերձ գյուղերում հիմնականում ապրում են երեխաներ ու 50-անց մարդիկ, իսկ աշխատող տարիքի մարդիկ կամ Ռուսաստանում են, կամ Երևանում, կամ որևէ այլ տեղ:

Պատգամավորը նշել է, որ եթե ցանկություն կա սահմանամերձ գյուղերին օգնել, ապա բիզնես միջավայրը բարելավելն ամենաճիշտ գործողությունը չէ: Ընդ որում, ներկայիս ծրագրում հարկային արտոնությունները ոչ միայն փոքր և միջին ձեռնարկատերերին են վերաբերում, այլև ԱԱՀ-ով աշխատող ձեռնարկատերերին:

«Այդ տատիկ-պապիկները վարսավիրանոց գնո՞ւմ են, խանութներից օգտվո՞ւմ են: Հիմա մենք դրանք ազատում ենք հարկից, բացի տաքսիից, որը կարող ես էնտեղ գրանցես, գաս Երևանում քշես։ Վատ բան ե՞նք անում», – Կառավարության ծրագիրը արդարացրել է ՀՀԿ-ական պատգամավոր, հարակից զեկուցող Վարդան Այվազյանը:

ՀԱԿ խմբակցության պատգամավոր Նիկոլ Փաշինյանը նշել է, որ հեռուստաալիքներով գովազդում են, թե Կառավարությունը սահմանամերձ գյուղին է օգնում, թեև իրականում այդ հայրենասիրական անվան տակ այլ բան է թաքնված:

«Այդ տատիկ-պապիկներն այդ խանութներում 100 հազարավոր [դրամների] նիսյաներ ունեն: Էդ փողը տվեք իրենց, տանեն իրենց պարտքերը փակեն, ոչ թե հիմա էլ հարկային արտոնությունների տակ սահմանամերձ գոտիներում ձեր օբյեկտները, ձեր միլիարդները կրկնապատկեք»,- ասել է Նիկոլ Փաշինյանը:

Ավելի վաղ 54 ձեռնպահ, 40 կողմ և 3 դեմ ձայների համամասնությամբ ԱԺ-ն մերժել էր սահմանապահ գյուղերի աջակցության օրինագիծը, որը ներկայացրել էր Փաշինյանը:

Վերջինս, մասնավորապես, առաջարկում էր սահմանապահ գյուղերի համար սահմանել 50 տոկոս զեղչ՝ էլ. էներգիայի, բնական գազի, խմելու և ոռոգման ջրի վարձավճարների մասով, ինչպես նաև սահմանապահ համայնքների բնակիչներին ազատել հողի հարկից և անշարժ գույքի գույքահարկից: Նման կետեր կառավարության նախագծի մեջ չկան։

Tekali Taxi