Home / Տեսանյութեր / «Հիմնադիր խորհրդարանի» անդամներից մեկը բանտում հացադուլ է սկսել

«Հիմնադիր խորհրդարանի» անդամներից մեկը բանտում հացադուլ է սկսել

«Նուբարաշեն» քրեակատարողական հիմնարկում գտնվող, ապրիլի 7-ին ձերբակալված և 2 ամսով կալանավորված «Հիմնադիր խորհրդարան» նախաձեռնության անդամ Գևորգ Սաֆարյանը երեկ հացադուլ է հայտարարել՝ իր նկատմամբ կիրառված ապօրինությունների ու քաղաքական հալածանքների կապակցությամբ։ Այս մասին ասված է նախաձեռնության հաղորդագրության մեջ։

Ապրիլի 16-ին Գևորգ Սաֆարյանին է այցելել իրավապաշտպան դիտորդական խումբը, որն արձանագրել է, որ նա տեղափոխվել է հացադուլ հայտարարած կալանավորների համար առանձնացված խուց։

Նախաձեռնության հաղորդագրության մեջ նշվում է, որ դիտորդական խումբը պատրաստակամ է իր ուշադրության կենտրոնում պահել Գևորգ Սաֆարյանի գործը և իրականացնել նրան պահելու պայմանների ու նրա առողջական վիճակի դիտարկում։

Նշենք, որ ապրիլի 7-ին հացադուլ էր հայտարարել նախաձեռնության ձերբակալված անդամներից ազատամարտիկ Պավել Մանուկյանը, ով ապրիլի 14-ին մարտական ընկերների հորդորով դադարեցրել էր այն։

Երեկ տարածած մեկ այլ հաղորդագրության մեջ «Հիմնադիր խորհրդարանն» ընդգծում է, որ «ռեժիմը իրեն ենթակա քրեական և այլ տարրերի միջոցով արդեն մի քանի օր է, ինչ սկսել է ապատեղեկատվության տարածումը քրեակատարողական հիմնարկներում առ այն, որ «100-ամյակը առանց ռեժիմի» շարժման գործունեության և նրա անդամների կալանավորման պատճառով հետաձգվում է համաներման հայտարարումը»:

Ըստ նախաձեռնության՝ այդ քայլով ռեժիմը փորձում է դատապարտյալների շրջանում բացասական վերաբերմունք ձևավորել «100-ամյակը առանց ռեժիմի» շարժման գործունեության և նրա անդամների նկատմամբ՝ դրանով իսկ հող նախապատրաստելով «100-ամյակը առանց ռեժիմի» շարժման կալանավորված անդամների նկատմամբ հնարավոր հոգեբանական և նույնիսկ ֆիզիկական ճնշումներ գործադրելու համար:

Հիշեցնենք, որ ապրիլի 7-ին ձերբակալվել էին նախաձեռնության 6 անդամներ։ Նրանցից 5-ին՝ Ժիրայր Սեֆիլյանին, Վարուժան Ավետիսյանին, Պավել Մանուկյանին, Գարեգին Չուգասզյանին, Գևորգ Սարֆարյանին կալանավորել են զանգվածային անկարգությունների նախապատրաստման մեղադրանքով, իսկ Արամ Հակոբյանին մեղադրել են ապօրինի զենք֊զինամթերք պահելու մեջ ու ազատ արձակել գրավի դիմաց։

Tekali Taxi