Home / Հայաստան / Հայաստանում գազալցակայաններն անվտանգ չեն. «Ժողովուրդ»

Հայաստանում գազալցակայաններն անվտանգ չեն. «Ժողովուրդ»

Այսօր Հայաստանում գործող գազալցակայանների մոտ կանգնելը, մեքենան լիցքավորելը և անգամ գազալցակայանի կողքով անցնելը վտանգավոր է: Հաշվի առնելով այն, թե ինչպես է վերահսկվում դրանց տեխնիկական անվտանգությունը, կարելի է ասել, որ գազալցակայանից օգտվելը յուրաքանչյուրի համար կարող է ճակատագրական լինել, գրում է «Ժողովուրդը»։ Թերթի փոխանցմամբ՝ նախօրեին դա ճակատագրական եղավ Գառնիի 24-ամյա բնակիչ Ռոման Սիմոնյանի համար, ով աշխատում էր Գառնիի մոտակայքում գործող գազալցակայանում:

Դեռևս մայիսի 12-ին Երևանի Ա. Բաբաջանյան փողոցի թիվ 75 շենքի մոտակայքում գտնվող գազալցակայանում տեղի էր ունեցել պայթյուն, որի հետևանքով վնասվել էր գազալցակայանի տանիքը: Բարեբախտաբար ոչ ոք չէր տուժել: Սակայն երկու օր անց՝ մայիսի 14-ին, Կոտայքի մարզի Գառնի գյուղի մոտակա գազալցակայանում տեղի ունեցած պայթյունն արդեն մարդկային կյանք խլեց. գազալցակայանի երիտասարդ աշխատակիցը տեղում մահացավ, իսկ մի վարորդ էլ մարմնական վնասվածք ստացավ: Թերթը հիշեցնում է, որ գազալցակայաններում պայթյուններ եղել են նաև նախորդ տարվա ընթացքում, ընդ որում` դարձյալ մարդկային զոհերով:

«Ժողովուրդ»-ը պարզել է, որ Գառնի գյուղի մոտակայքում գործող գազալցակայանը պատկանում է Գառնիի գյուղապետ Աշոտ Վարդանյանին, իսկ ՍՊԸ-ի տնօրենն է Արտաշես Մկրտչյանը, ով գյուղապետի ազգականն է: Պարզվեց, որ նախքան այս դեպքն արդեն Գառնիի գյուղապետ Աշոտ Վարդանյանը այս գազալցակայանի հետ կապված հասցրել է հայտնվել իրավապահների տեսադաշտում: Նա տեղական տուրքերը, վճարները հաշվարկելու և գանձելու կարգի պահպանման նկատմամբ հսկողություն չի իրականացրել՝ դրսևորելով անգործություն: Մասնավրապես՝ նա միջոցներ չի ձեռնարկել Գառնի համայնքում գործող, իր ազգականին պատկանող գազալցակայանի 2 տարվա և բենզալցակայանի 3 տարվա տեղական տուրքը գանձելու ուղղությամբ, ինչի հետևանքով համայնքին պատճառվել է էական վնաս:

2014 թվականի նոյեմբերի 27-ին ՀՀ գլխավոր դատախազությունը հարուցել էր երեք քրեական գործ՝ համայնքին պատճառած վնասի, դիտավորության, խաբեությամբ զգալի չափերի գումար վերցնելու և հափշտակելու հատկանիշներով։ Հարուցված երեք գործերը միացվել էին մեկ վարույթում, իսկ Գառնի համայնքի ղեկավար Վարդանյանը գործում ներգրավվել էր որպես մեղադրյալ։ Սակայն հարուցված բոլոր քրեական գործերը կարճվել էին։

Մանրամասները՝ թերթի այսօրվա համարում

Tekali Taxi