Home / Տեսանյութեր / Ինչո՞ւ հայկական կողմը չի ձերբակալում Պերմյակովին․ դատախազը պնդում է՝ տեսության մեջ անգամ նման դեպք չկա

Ինչո՞ւ հայկական կողմը չի ձերբակալում Պերմյակովին․ դատախազը պնդում է՝ տեսության մեջ անգամ նման դեպք չկա

«Ինչո՞ւ չեք ձերբակալել, ինչո՞ւ հիմա չեք գնում ռուսական ռազմաբազա, ձերբակալում Վալերի Պերմյակովին և հանձնում նրան Հայաստանի իրավապահ մարմիններին», – այսօր ԱԺ-ում ՀՀ գլխավոր դատախազ Գևորգ Կոստանյանին այս հարցն է ուղղել «Ժառանգություն» խմբակցության անդամ Զարուհի Փոստանջյանը:

Կոստանյանն ասել է, որ Ավետիսյանների ընտանիքի սպանության գործի առնչությամբ աննախադեպ իրավիճակ է ստեղծվել և՛ հայ, և՛ ռուս իրավապահների համար․ այժմ նրանք խնդրի լուծման ուղիներ են փնտրում, որպեսզի լուծումը համապատասխանի միջազգային իրավունքին:

«Այս պահի դրությամբ ավելի բան չեմ կարող ասել՝ քննության հետ կապված: Տեսության մեջ անգամ նկարագրված չէ նման իրավիճակ։ Կոպիտ ասած, ունենաս մի հիվանդ, որի հիվանդությունը անգամ գրքերում նկարագրված չէ: Դրա համար մենք քննարկում ենք, որ լուծում գտնենք», – ասել է Կոստանյանը:

Փոստանջյանը հակադարձել է, թե Վալերի Պերմյակովի ձերբակալությունը ռուս իրավապահների կողմից օրինական չի եղել և անօրինականության հետևանքները պարտավոր էր վերացնել ինքը՝ գլխավոր դատախազը՝ պատասխանատվության կանչելով ԱԱԾ֊ին, ոստիկանության աշխատակիցներին:

Հիշեցնենք, որ Փոստանջյանը դատախազից պահանջել էր քրեական գործ հարուցել Ավետիսյանների ընտանիքի սպանության մեջ մեղադրվող 102-րդ ռազմաբազայի ծառայող Վալերի Պերմյակովին առևանգելու դեպքի առթիվ։ 

Դատախազությունը քրեական գործ չէր հարուցել, և այժմ Փոստանջյանը Կոստանյանի անգործությունը վիճարկում է դատարանում: Առաջին ատյանում և Վերաքննիչ դատարանում Փոստանջյանի բողոքը մերժվել է։

Ռուսական 102-րդ ռազմաբազայի զինծառայող Վալերի Պերմյակովը մեղադրվում է հունվարի 12-ին Գյումրիում Ավետիսյանների ընտանիքի 7 անդամների սպանության մեջ։ Համաձայն պաշտոնական վարկածի, հունվարի 13-ին Պերմյակովի գտել էին ռուսաստանցի սահմանապահները հայ֊թուրքական սահմանի մոտ և հանձնել ռուսական ռազմաբազայի վերահսկողության ներքո։ Այդ փաստը բողոքի ալիք էր բարձրացրել Գյումրիում, հազարավոր մարդիկ փողոց էին դուրս եկել՝ պահանջելով Պերմյակովին հանձնել ՀՀ իրավասու մարմիններին։ Ռուսաստանցի զինծառայողը, սակայն, մինչ օրս գտնվում է ռազմաբազայում, չնայած Հայաստանում մի շարք փորձագետներ նշել են, որ ռուսաստանցի զինծառայողին հայկական կողմին չհանձնելը հայ֊ռուսական միջազգային պայմանագրի խախտում է։

Tekali Taxi