Ոստիկաններն ընդդեմ բողոքող ուսանողների
Այսօր Ազգային ժողովի դիմաց ակադեմիական տարկետման վերացման դեմ պայքարող ուսանողները բողոքի ակցիա են անցկացրել՝ որոշ ժամանակով դուրս գալով Բաղրամյան պողոտայի երթևեկելի մաս: Ոստիկաններն ավելացրեցին ուժերը՝ ուսանողների դեմ դուրս բերելով նաև կարմիր բերետավորներին: Տեղ-տեղ հրմշտոցի ընթացքում ոստիկանները հարվածում են ակցիայի առանձին մասնակիցներին, գցում գետնին և քարշ տալիս:
Ուսանողական ակցիայի մասնակիցները դիմադրեցին ոստիկանների առաջին հարվածին՝ ամբողջությամբ չազատելով Բաղրամյան պողոտայի երթևեկելի մասը: ԵՊՀ-ի Ֆիզիկայի ֆակուլտետի լսարանում հացադուլ անող ուսանողներն ընդունեցին ակցիային միանալու կոչը: Կոչը հնչեցրած Վահան Կոստանյանը հայտարարեց, որ հետագա քայլերը պետք է որոշվեն կոլեկտիվ սկզբունքով՝ «մեզ պետք են սթափ որոշումներ»:
Ավելի ուշ «Հանուն գիտության զարգացման» նախաձեռնության անդամ Դավիթ Պետրոսյանն Էդուարդ Շարմազանովի հետ հանդիպել է լրագրողների հետ։ Մինչ դա, մի քանի ուսանողներ գրեթե մեկ ժամ բանակցություններ էին վարել Ազգային ժողովում:
Դավիթ Պետրոսյանը հայտարարել է, որ իշխանությունն իրենց կլոր սեղան կազմակերպելու հնարավորություն է տվել։ Էդուարդ Շարմազանովի խոսքերով՝ նրանք ուսանողների հետ խոսել են երեք կարևոր կետի շուրջ։ Կլոր սեղանի շրջանակներում, որը լինելու է հրապարակային, քննարկվելու է տարկետման խնդիրը, ուսանողության և կրթության «բազում խնդիրներ»։