Home / Կրթություն / Դպրոցում տասնամյակներ շարունակ ստորացնում էին եզդի երեխաներին

Դպրոցում տասնամյակներ շարունակ ստորացնում էին եզդի երեխաներին

Արմավիրի մարզի Ֆերիկ համայնքի բնակիչները նամակով դիմել են կրթության և գիտության նախարար Արայիկ Հարությունյանին և պահանջում են դպրոցի տնօրենի հրաժարականը։ Նամակը հրապարակել է politik.am կայքը, որը տեղադրել է նաև տեսանյութը․

Բողոքի ակցիա Ֆերիկ գյուղում

Gepostet von politik.am am Samstag, 1. September 2018

Հարգելի պարոն նախարար,

Ձեզ են դիմում Արմավիրի մարզի Ֆերիկ համայնքի մի խումբ բնակիչներ, ովքեր դժգոհ են գյուղի դպրոցում ստեղծված իրավիճակից: Արդեն 30 տարուց ավել է դպրոցը ղեկավարում է Լևոն Պողոսյանը: Նրա ղեկավարման տարիներին դպրոցի կրթական մակարդակը իջել է, դպրոցում գրեթե չկան մասնագետներ, որոնք իրենց պարտականությունների շրջանակում կաշխատեն մեր երեխաների հետ: Եթե ԽՍՀՄ տարիներին այս գյուղից բազմաթիվ ուսանողներ կային, ապա վերջին 30 տարիներին ոչ մի ուսանող դուրս չի եկել դպրոցից:

Դպրոցում հաճախ երեխաների հետ չի տարվում անհրաժեշտ աշխատանք, որպեսզի նրանք ներգրավվեն կրթական պրոցեսին, հաճախ ուսուցիչները անհարգալից վերաբերմունք են ցույց տալիս երեխաների նկատմամբ, վիրավորում նրանց արժանապատվությունը: Դասապրոցեսը կազմակերպվում է կիսատ, դասերը երբեմն բաց են թողնվում: Երեխաներին անվանում են դեբիլ, անգրագետ ու հայտարարում, որ եզդի են ու միևնույնն է նրանց սովորել պետք չէ, կան ուսուցիչներ, ովքեր շատ հաճախ խմած են գալիս դպրոց, դպրոցի տնօրենը և իր ընկեր ուսուցուչիները շատ հաճախ դպրոցում քեֆեր են կազմակերպում՝ երեխաների ներկայաությամբ ոգելից խմիչք օգտագործում: Մինչ թավշյա հեղափոխությունը մենք չէինք կարողանում խոսել այս խնդիրների մասին, քանի որ կարծում էինք, որ գյուղը եզդիաբնակ է ու մարզպետարանը և կառավարությունը ուշադրություն չէին դարձնի մեր խնդիրներին: Հեղափոխությունից հետո մեզ մոտ հույս է արթնացել, որ կկարողանանք մեր դպրոցի խնդիրների մասին խոսել ու ի վերջո կփոխվի դպրոցում իրավիճակը և մեր երեխաները որակյալ կրթություն կստանան:

Գյուղի բնակիչները այլևս չեն ցանկանում, որպեսզի դպրոցը ղեկավարեն մարդիկ, որոնք չեն ցանկանում կրթություն տալ մեր երեխաներին, որոնք երեխաների նկատմամբ խտրական վերաբերմունք են ցուցաբերում: Չնայած, որ  դպրոցում կան բարեխիղճ ուսուցիչներ ևս: Բայց ուսուցչական կազմի և տնօրենի փոփոխություն ենք պահանջում:

Tekali Taxi