Գյուղապետը դիմադրում է ուրցաձորցիների պահանջին՝ հղում անելով իր դեմքին

Արարատի մարզի Ուրցաձոր խոշորացված համայնքի 3 գյուղերի մի խումբ բնակիչներ սեպտեմբերի 28-ի առավոտից բողոքի ակցիա էին անցկացնում գյուղապետարանի մոտ՝ պահանջելով համայնքը 19 տարի ղեկավարող Ռաֆիկ Անդրեասյանի հրաժարականը:

Բողոքավորները պնդում են, որ Ռաֆիկ Անդրեասյանը համայնքապետի պաշտոնում բազմաթիվ չարաշահումներ է թույլ տվել: Մասնավորապես նշում են, որ գյուղապետարանի նախկին շենքն այժմ Անդրեասյանի առանձնատունն է: Վերջինս ասում է, որ ամեն ինչ արվել է օրենքի շրջանակում:

Գյուղացիները ասում են նաև, որ գյուղապետն ու իր ընտանիքը տնօրինում են համայնքի վարձակալական հողերի նշանակալի մասը: «Մենք ուղղակի պահանջում ենք համայնքապետի հրաժարականը: Ունենալու ենք նոր համայնքապետ, ով կաշխատի հավասարազոր բոլորի համար: Եթե մինչև ժամը 6-ը մեր համայնքապետը չտվեց իր հրաժարականը, մի մարդու պես՝ էրեխոքով, մայրերով, քույրերով փակում ենք միջպետական ճանապարհը», – ցուցարարների խոսքերը փոխանցում է «Ազատությունը»:

Արարատի մարզպետի խորհրդականը նրանց հորդորեց չդիմել կտրուկ քայլերի, իսկ համայնքապետին կոչ արեց ընդառաջ քայլ անել՝ հնարավորություն ստեղծել համայնքում արտահերթ ընտրություններ անցկացնելու համար:

«Ժողովուրդը էսօր ոչ թե հրաժարական ա ուզում, այլ ընտրելու հնարավորություն ա ուզում: Տարիներ շարունակ էս ժողովուրդը ընտրության իրավունքից զրկված ա էղել: Էս համայնքի ղեկավարները, Ազգային ժողովը, որ «ընտրվել» են, իրանք չեն ընտրվել: Դա արվել ա ահռելի ընտրակաշառքների, ճնշումների․․․ բոլոր էդ նեգատիվ միջոցների կիրառմամբ, վարչական ռեսուրսի կիրառմամբ: Ես համարում եմ, որ էսօրվա Ազգային ժողովը, համանքների ղեկավարների մեծամասնությունը լեգիտիմություն չունեն», – «Ազատության» հետ զրույցում ասաց մարզպետի խորհրդականը:

Գյուղապետարանի մոտ հավաքվել են նաև գյուղապետի աջակիցները, որոնք ասում են, թե Անդրեասյանը գյուղապետարանի նոր շենք է կառուցել, շուտով կսկսի գործել մանկապարտեզը:

«Ես հրաժարական տվողի դեմք ու դիրք ունե՞մ: Դուք տեսաք․ պատերը խոսում են, էլ ես ինչ խոսեմ: Իմ արած աշխատանքը հենց խոսուն ա, ինքը լեզու ա», – ասաց գյուղապետը։

Արձագանքելով մարզպետի խորհրդականի՝ նոր ընտրություններ անցկացնելու հորդորին, Անդրեասյանն ասաց․ – «Ո՞վ է ասում, որ մեր ընտրությունները արդար չեն եղել: Մարզպետի խորհրդականը եթե նման բան ա ասել, չարաչար սխալվում ա: Ես ո՛չ մարզպետարանի ենթական եմ, ո՛չ էլ էն․․․․ Ես խոստում ունեմ տված քվեների դիմաց, ես իմ աշխատանքով շնորհակալություն եմ հայտնելու, միշտ էլ հայտնել եմ»:

5 հազար բնակիչ ունեցող խոշորացված համայնքի բյուջեն կազմում է շուջ 120 մլն դրամ:

Գյուղապետի հրաժարականը պահանջողները հայտարարում են, որ չեն դադարեցնելու բողոքի ակցիան, մինչև Անդրեասյանի չհրաժարվի պաշտոնից: Նրանք մերժեցին համայնքի ղեկավարի առաջարկը՝ գյուղապետարանի շենքի դահլիճում քննարկել խնդիրները:

Գյուղապետն ու նրա աջակիցները, մինչդեռ, հայտարարում են, որ հրաժարականի պատճառներ չկան:

Անդրեասյանը ասաց, որ հրաժարական չի տալու, փակեց գյուղապետարանի դռներն ու հեռացավ:

տեսանյութերն ու տեքստը՝ azatutyun.am-ի