Նույն զորամասում են մեր զավակներին սպանել

Տեսանյութում զոհված զինծառայողների մայրերը պատմում են, որ իրենց որդիների սպանությունները կատարվել են նույն զորամասում, թվարկում են դեպքերի պատասխանատուների և վկաների անունները և որոշ մանրամասներեն ներկայացնում։ Երկու դեպքերն էլ որակվել են որպես ինքնասպանություն։

Խոսքը 2016 և 2018 թվականներին Տավուշի մարզի «Մեհրաբ» զորամասում՝ Արմավիրի մարզից զորակոչված երկու ժամկետային զինծառայողների մահվան դեպքերի մասին է։ 2016 թվականի հուլիսի 3-ին «ինքնասպանություն գործեց» Արսեն Մխիթարյանը: Զենքի վրա չկան մատնահետքեր, չկա գնդակը, որից մահն է վրա հասել։ Ծնողները տեղեկություններ ունեն, որ «Արսենին չեն թողել ծառայի», իսկ մահվան մեջ մեղավորները հովանավորվում են բարձրաստիճան պաշտոնյաների կողմից։ Գործի մասին մանրամասն՝ այստեղ

2018 թվականի մայիսի 6-ին «ինքնասպանություն գործեց» Լևոն Թորոսյանը։ Ըստ ռազմական փորձագետ Ռուբեն Մարտիրոսյանի՝ Թորոսյանին սպանել են՝ նախ ուժեղ հարված հասցնելով ամորձիների շրջանում, ինչի մասին վկայում է դատաբժշկական փորձաքննությունը, ապա կրակել են նրա վրա։ Արմունկների շրջանում քերծվածքներ կան, որոնք առաջացել են դին քարշ տալիս։ Ծնողները տեղեկություն ունեն, որ վերադասները «սամավոլկայի համար» են որդուն ճնշել։ Գործի մանրամասներն՝ այստեղ