Home / Առողջապահություն / Ախտորոշվածները չեն մեկուսացվի հյուրանոցներում կամ հիվանդանոցներում

Ախտորոշվածները չեն մեկուսացվի հյուրանոցներում կամ հիվանդանոցներում

Մի քանի օրից կորոնավիրուսային հիվանդության թեստի դրական արդյունքով հարյուրավոր քաղաքացիներ, որոնք չունեն ախտանշաններ կամ ունեն շատ թեթև, մեկուսացման վայրերից վերադառնալու են տուն, իսկ նոր ախտորոշված քաղաքացիները չեն մեկուսացվելու հյուրանոցներում կամ հիվանդանոցներում: Այս մասին հայտարարել է առողջապահության նախարար Արսեն Թորոսյանը:

Ֆեյսբուքի միջոցով նա դիմել է քաղաքային պոլիկլինիկաների, գյուղական ամբուլատորիաների և բժշկական կենտրոնների բուժաշխատողներին. «Նրանց տնային հսկողությունը ընկնելու է ձեր բոլորի ուսերին, ինչպես նախկինում՝ թեթև ախտանշաններ ունեցող սուր շնչառական վարակներով մեր քաղաքացիների հսկողությունը:

Այս փոփոխությունը պայմանավորված է երկու հանգամանքով: Առաջինը՝ դրական ախտորոշում ունեցող քաղաքացիների թիվն է, որն օրեցօր աճում է, իսկ երկրորդը՝ անախտանիշ դեպքերի վարման ռազմավարության փոփոխությունը` մահճակալների և այլ ռեսուրսների օպտիմալ օգտագործման տեսանկյունից»:

Ռազմավարության այս փոփոխությունը սահուն իրականացնելու համար Առողջապահության ազգային ինստիտուտն կազմակերպելու է Covid-դրական պացիենտների տնային պայմաններում վարման ընթացակարգերի լայնածավալ հեռավար դասընթացներ։

«ԱԱՊ օղակի և հիվանդանոցային համակարգի կապը օպերատիվ կերպով պահելու համար ՀՀ ԱՆ Սուրբ Գրիգոր Լուսավորիչ ԲԿ-ում հիմնվելու է բժիշկների համար նախատեսված զանգերի կենտրոն, որտեղ կորոնավիրուսային հիվանդության բուժման ավելի մեծ փորձ ունեցող բժիշկ-մասնագետները խորհրդատվություն կտրամադրեն իրենց գործընկերներին թե՛ մեթոդական հարցերի, թե՛ կոնկրետ պացիենտների վերաբերյալ», – գրել է նախարարը:

Մայիսի 19-ի ժամը 11-ի դրությամբ Հայաստանում հաստաված է կորոնավիրուսային հիվանդության ընդհանուր 5041դեպք, որոնցից 2164` արդեն առողջացած և 64-ը` մահվան ելքով: Փաստացի բուժում ստանում է 2788 պացիենտ:

Կատարվել են շուրջ 43041 թեստավորում: