Home / Հայաստան / Հայաստանի կառավարությունը կշարունակի գումարով աջակցել արցախցիներին

Հայաստանի կառավարությունը կշարունակի գումարով աջակցել արցախցիներին

Ղարաբաղում հաշվառված կամ փաստացի բնակվող քաղաքացիներին Հայաստանի կառավարությունը կշարունակի ամսական 68 000 դրամ աջակցություն տրամադրել։ 108 000 շահառուների աջակցության համար գործադիրը կհատկացնի ևս 7 միլիարդ 344 միլիոն դրամ․ որոշումն ընդունվել է գործադիրի այսօրվա նիստում։

Գումարը կհատկացվի շահառուներին հունիս ամսվա համար, իսկ դրամական աջակցության իրավունքը հունիսին ձեռք բերածներին՝ նաև նախորդ ամիսների համար։

Արցախցիներին ուղղված աջակցության ծրագրերի համար Հայաստանի կառավարությունն արդեն իսկ հատկացրել է 61,8 միլիարդ դրամ։

Փոխվարչապետի պաշտոնակատար Մհեր Գրիգորյանի փոխանցմամբ՝ ծրագիրը կգործի այնքան ժամանակ, մինչև կառավարությունն արցախցիներին չապահովի բնակարաններով։

«Արցախի կառավարության ֆինանսական պարտավորությունների և իրավաբանական անձանց գույքային վնասները փոխհատուցելու ծրագրով նախատեսված ծախսը կկազմի տարեկան մինչև 10 մլրդ դրամ։ Հիմնադրամի հետ համատեղ հարցի լուծման նպատակով պետք է մոբիլիզացվի մոտ 104 մլրդ, ինչը նշանակում է, որ կառավարության ծախսը 3 տարվա կտրվածքով կկազմի շուրջ 52 մլրդ դրամ», – հավելել է Գրիգորյանը։

Tekali Taxi