Բրիտանիան արտոնել է թագավարակի դեմ հում դեղահաբը

Բրիտանիան աշխարհում առաջինն է հաստատել կորոնավիրուսի հետևանքները մեղմացնող դեղահաբի` Molnupiravir-ի կիրառումը։ 

Մոլնուպիրավիրը նշանակվելու է առավել խոցելի պացիենտներին՝ օրական երկու դեղաչափով։ Կլինիկական հետազոտությունը (փորձագետների կողմից գրախոսված չէ) վկայում է, որ այն շուրջ երկու անգամ նվազեցնում է հետագա հոսպիտալացման և մահվան վտանգը թեթև կամ միջին ծանրության ախտանիշներ ունեցող պացիենտների մոտ, որոնք գտնվում են ռիսկի գոտում։

Մոլնուպիրավիրը ստեղծվել է Merck ամերիկյան դեղագործական կորպորացիայի կողմից՝ Ridgeback Biotherapeutics-ի հետ համագործակցությամբ։

Դեղամիջոցը փորձում է խախտել կորոնավիրուսի ծագումնաբանական (գենետիկ) կոդը, ինչը, ըստ արտադրողների, կանխում է նաև մարդու մարմնում վիրուսի տարածումը։ Մոլնուպիրավիրը գործում է էնզիմներից մեկի դեմ, որը վիրուսն օգտագործում է ինքնավերարդատրվելու համար։

Merck-ը հավաստիացնում է, որ հաբը արդյունավետ է թե՛ ի հայտ եկած, թե՛ հավանական նոր շտամների դեմ։

Բրիտանական MHRA-ը (the Medicines and Healthcare products Regulatory Agency) այն խորհուրդ է տալիս նշանակել առնվազն մեկ ռիսկային գործոնի (ուղեկցող ծանր հիվանդություն, դիաբետ, սրտանոթային խնդիրներ, գիրություն, բարձր տարիք) առկայության պարագայում։

Մոլնուպիրավիրը, ըստ էության, կորոնավիրուսի հետևանքների դեմ պայքարող առաջին (հաստատված) օրալ դեղամիջոցն է, հետևաբար՝ այն կարող է օգտագործվել արտահիվանդանոցային պայմաններում։

Բրիտանիան դեղամիջոցի շուրջ 480 հազար կուրս է պատվիրել․ մատակարարումը կիրականացվի մինչև տարեվերջ։

Կլինիկական հետազոտություններ

Կլինիկական հետազոտության տվյալները հրապարակվել են որպես մամլո-հաղորդագրություն՝ գրում է BBC-ին։ Հետազոտությունը փորձագետների կողմից չի գրախոսվել։

Համաձայն այդ հաղորդագրության, հետազոտություններին մասնակցել է 775 պացիենտ, բոլորը՝ քովիդ-դրական (թեթև կամ միջին ծանրություն) և առնվազն մեկ ռիսկի գործոնով։

Արդյունքները հետևյալն են․

— դեղամիջոցն ընդունած պացիենտների 7․3 տոկոսը հոսպիտալացվել է, մահեր չեն արձանագրվել։
— պլացեբո ստացածներից հոսպիտալացվել է 14․1 տոկոսը, 8 հոգի մահացել է։

Հիվանդության սկզբնական փուլում դեղամիջոցի արդյունավետությունը համարվում է հաստատված։

Ավելի վաղ արտադրողները ևս մեկ հետազոտություն են նախաձեռնել, որին մասնակցել են ծանր վիճակում հոսպիտալացված պացիենտները։ Հետազտությունը ստիպված են եղել ընդհատել, քանի որ դեղամիջոցը շոշափելի արդյունքներ չի արձանագրել։

Merck-ը առաջինն է կլինիկական հետազոտություններ սկսել, բայց կան նաև դեղագործական այլ ընկերություններ, որոնք այժմ աշխատում են քովիդի հետևանքները մեղմացնող դեղամիջոց ստեղծելու ուղղությամբ։ Հակավիրուսային երկու տարբեր դեղամիջոցների ուսումնասիրություն է սկսել Pfizer-ը, նման դեղամիջոց է մշակում նաև շվեյցարական Roche-ը։