Նորակոչիկները Արցախ չեն տարվելու և այլ խոստումներ

Նորակոչիկները Արցախ այլևս չեն տարվելու։ Գլխավոր շտաբի անձնակազմի կառավարման վարչության պետի տեղակալ Սահակ Սահակյանի խոսքով՝ մինչև օգոստոսի 30-ը Արցախում ժամկետային զինծառայողներ չեն լինի։

Ժամկետայիններին հանել առաջնագծից

«Ռազմաքաղաքական ղեկավարության կողմից որոշում է կայացվել, Արցախում ծառայությունն այս պահին իրականացվում է պայմանագրային զինծառայողներով։ Մեր վերջին ժամկետային զորակոչը՝ 2020 թվականի ամռան զորակոչը, հուլիսի 1-ից կզորացրվի։ Մինչև օգոստոսի 30-ը այլևս Արցախում ժամկետային զինծառայողներ չենք ունենա», – ասել է Սահակյանը։

Արցախում, ըստ նրա, «ծառայության գրավչության համար» փաթեթ է մշակվել։ Պաշտպանության բանակի թափուր հաստիքները համալրվում են պայմանագրայիններով։ Գնդապետի խոսքով՝ քանակը բավարարում է, «բրեշներ չունենք»։

Ռազմաքաղաքական ղեկավարությունը, ըստ Սահակյանի, փորձում է ժամկետային զինծառայողներին հնարավորինս հանել առաջնագծից։

«Մենք ունենք այդպիսի փորձ նաև Հայաստանում․ երրորդ բանակային կորպուսում ժամկետային զինծառայողներ այլևս չէին ընդգրկվում առաջնագծի մարտական հերթապահության մեջ։ ․․․Կորպուսում խնդիրներ առաջացան, շատ փոքր թվականակով ժամկետայիններ [այժմ] ընգրկվում են, բայց ժամկետայինների 90 տոկոսը երրորդ բանակային կորպուսում մարտական հերթապահության մեջ չեն ընդգրկվում։

Հնարավորության սահմաններում և կախված պայմանագրայինների քանակից՝ մնացած բոլոր զորամիավորումներում գնալու ենք դրան․ ժամկետային զինծառայողները զբաղվելու են միայն պատրաստությամբ, անհրաժեշտության դեպքում պիտի կիրառվեն ըստ նշանակության», – ասել է բարձրաստիճան զինվորականը։

Առաջին հինգ ամիսները ուչեբկայում

Պաշտպանության նախարարի կողմից նոր կարգ է սահմանվել, որ գործելու է՝ սկսած այս զորակոչից։

«Բոլոր նորակոչիկները ուղարկվելու են ծառայության հրաձգային ուսումնական գումարտակներում։ Այդ գումարտակներում գտնվելու են մոտավորապես 5 ամիս՝ մինչև ուսումնական փուլի ավարտը։ Նպատակն է, որ զինվորները՝ ոչ լրիվ պատրաստություն անցած, մարտական հերթապահության չընդգրկվեն։

Այսինքն՝ զինծառայողները մարտական հերթապահության կարող են ընդգրկվել միայն զորակոչից 5-6 ամիս հետո», – ամփոփել է գնդապետը։