Երևանի փողոցները փակ են. որոնում են ծանր հանցագործություն կատարած անձանց (թարմացված)
Այսօր առավոտվանից Երևանի կենտրոնական մի քանի փողոցներում կանգնած են եղել զրահաբաճկոններով և ավտոմատներով զինված ոստիկաններ: Նույն հանդերձանքով և նույնպես զինված էին ճանապարհային ոստիկանները: Մի քանի փողոցներ փակ էին, մեքենաների մուտքն այդ փողոցներ արգելված էր:
Epress.am-ի հարցին ի պատասխան Երևանի Կենտրոնի ոստիկանության հասարակայնության հետ կապերի բաժնի ղեկավար Արմեն Մալխասյանը նշել է, որ «ծանր հանցագործության մեջ կասկածվող անձանց վնասազերծելու նպատակով` քաղաքում օպերատիվ միջոցառումներ են իրականացվում»:
Արմեն Մալխասյանն առայժմ այլ մանրամանսեր չի հաղորդել:
Մեր տեղեկություններով, այսօր վաղ առավոտյան տեղի ունեցած հանցագործության վայրից զինված հանցավոր խումբը փախուտի է դիմել, և որոնողական աշխատանքները շարունակվում են մինչ այս պահը: Չճշտված տեղեկություններով, ուժայիններին հաջողվել է որսալ հանցագործության մասնակիցներից մեկին:
Նշենք, որ այս պահին Մյասնիկյանի պողոտայում` Կենդանաբանական այգու մոտակայքում, վթարի ենթարկված Mercedes մակնիշի մեքենա կա, որի շուրջ հավաքվել են ոստիկաններ: Դեպքի վայրում նաև դիակ է ընկած եղել:
