Գլխավոր / Армения / ԵՄ հատուկ հանձնակատարը չի ցանկանում Ղարաբաղի հարցը հետաձգել 40 տարով

ԵՄ հատուկ հանձնակատարը չի ցանկանում Ղարաբաղի հարցը հետաձգել 40 տարով

Հարավային Կովկասում ԵՄ հատուկ հանձնակատար Պիտեր Սեմնեբին հայտարարել է, թե այսօր անհրաժեշտություն կա խորհրդակցել տարբեր կողմերի հետ և համոզել Հարավային Կովկասի երկրներին, որ Հայաստանում ռուսական ռազմակայանի տեղակայման ժամկետի երկարաձգման մասին պայմանգիրը ոչ մի սպառնալիք չի ներկայացնում նրանց համար: «Դա Հայաստանի և Ռուսաստանի երկկողմանի գործն է»,- ևս մեկ անգամ ընդգծել է Սեմնեբին, հաղորդում է Коммерсант-ը:

«Հարկավոր է ավելի լայն համատեքստում դիտարկել Կովկասի ռազմական ներուժը: Զարմանալի չէ, օրինակ, Հայաստանի այսօրվա մտահոգությունը Ադրբեջանում լայնածավալ ռազմական ծախսերի առնչությամբ: Եթե կողմերը միջոցներ և հակամիջոցներ ձեռնարկեն, դա կարող է ի վերջո նվազեցնել ուժի կիրառման հավանականությունը, ինչը շատ վտանգավոր և ողբերգալից կլիներ: Չի կարելի թույլ տալ Լեռնային Ղարաբաղի հակամարտության ռազմական հանգուցալուծումը»,- հավելել է Սեմնեբին:

Պատասխանելով հարցին, թե արդյոք Հայաստանում ՌԴ ռազմակայանի տեղակայման ժամկետի երկարաձգումը 49 տարով նշանակում է, որ Ղարաբաղյան հակամարտությունում կպահպանվի ստատուս-քվոն, ԵՄ հատուկ հանձնակատարը նշել է, որ «շատ ցավալի կլիներ, եթե Ղարաբաղյան հակամարտությունը չկարգավորվեր ևս 40 տարվա ընթացքում»:

«Այն արդեն շատ երկար է տևում, այն վտանգ է ներկայացնում տարածաշրջանի երկրների, տարածաշրջանի հարևանների համար. չէ՞որ այն վակուումի մեջ չէ: Անհրաժեշտ է ապահովել հրադադարի ռեժիմը շփման գծում, որտեղ մենք վերջին ամիսների ընթացքում նկատել ենք միջադեպեր և փոխհրաձգություններ: Համերաշխությունը, իհարկե, չի լուծում խնդիրը, սակայն այն նպաստում է բանակցային գործընթացի կարգավորմանը»,- մեկնաբանել է Պիտեր Սեմնեբին:

Tekali Taxi